БЫРААС БЫҺААРАР: Сирэй, атах иһэрин кистэлэҥнэрэ

Аһаабытын кэннэ сирэй, атах иһэрин (отек) үөскээһинэ сүрэх, бүөр, быар эбэтэр эндокриннай система кистэлэҥ ыарыылара баалларын туоһулуон сөп. Бу туһунан Судаарыстыбаннай үөрэхтээһин университетын мэдиссиинэ факультетын терапия кафедратын доцена Ирина Волгина иһитиннэрдэ.

Быраас этэринэн, доруобай киһиэхэ куттала суох бородуукталар сирэй, атах иһэрин үөскэппэттэр. «Өскөтүн маннык сибики көстөр буоллаҕына, бырааска көрдөрүнэр наада — үксүн сүрэх-тымыр, бүөр, быар эбэтэр эндокриннай былчархайдар ыарыыларын кытта сыһыаннаах», — диэн исписэлиис «Известия» хаһыакка эттэ.

Туустаах астар- чипсы, хатарыллыбыт килиэп, хатарыллыбыт уонна тууһаммыт балык, тууһа элбэх сыырдар, бэлэм соустар. Ону тэҥэ минньигэс астар — бэчиэнньэ, торт, кондитерскай оҥоһук, минньигэс гаастаах утах сирэй, атах иһэрин күүһүрдүөхтэрин сөп. Маны кытта аһыы, сыалаах, ыһаарыламмыт уонна кэнсиэрбэлэммит астар, ону тэҥэ фастфуд, арыгы уонна кофеиннаах утахтар кутталлаахтар.

Быраас быһаарарынан, сүрүн төрүөтэ туус уонна саахар элбэҕиттэн киһиэхэ уу хаайтарыытыгар сытар, тоҕо диэтэххэ кинилэр уу-туус балансатын кэһэллэр. Ону таһынан, сирэй, атах иһэрэ сороҕор глютеннээх, ону тэҥэ гистаминнаах ферментированнай астары сиэһинтэн үөскүөн сөп. Ханнык эмэ биир чопчу бородууктаҕа ас аллергията эмиэ сирэй, атах иһэригэр тиэрдэр. Эбиликтэрдээх бэлэм оҥоһуктар, ол иһигэр натрий глутаматтаах астар туспа оруоллаахтар: кинилэр киһи утаҕы иһэр уонна аһыыр баҕатын күүһүрдэллэр, ол барыта эбии ууну иһиигэ уонна киһи этигэр-сиинигэр мунньуллуутугар тириэрдэр.

Быраас сирэй, атах иһэр буоларыгар терапевка эбэтэр идэлээх исписэлиискэ уһаппакка көрдөрүнэргэ сүбэлээтэ.