Быраас киһини өлөр өлүүттэн быыһаата

Ааспыт өрөбүллэргэ Уус Алдан улууһун Сыырдаах сэлиэнньэтигэр ат сүүрдүүтэ буола турдаҕына, 60 саастаах киһи эмискэ өйүн сүтэрэн, охтон түспүт уонна сирэйэ көҕөрөн барбыт, сүрэҕэ тохтообут. Хата, манна Уус Алдан улууһун киин балыыһатын кылаабынай бырааһа Сергей Черкашин баар буолан, кинини өлөр өлүүттэн быыһаабыт.

— Ат сүүрдүүтэ улууспутугар сыл аайы ыытыллар. Мин көрөөччү быһыытынан, өрөбүлбэр сынньана барбытым. Күрэхтэһии буола турдаҕына, эмискэ дьон аймаммыта, иһиттэхпинэ, бырааһы ыҥыраллар. Син тэйиччи этим, сүүрэн тиийдэҕим дии. Бу киһи сүрэҕэ тохтоон, тыыммат буолбут этэ. Тута реанимацияны оҥорон киирэн барбытым, биэс мүнүүтэнэн, киһим өйдөммүтэ. Учаастак бырааһын ыҥыраммыт, тута киин балыыһаҕа илдьибиттэрэ. Туох да мэдиссиинискэй тэрилим суох этэ буоллаҕа, «суһал көмө» биригээдэтэ кэлиэр диэри бастакы көмөнү оҥорон, тыынарын, сүрэҕин үлэтин сөргүтэр сыаллаах этим, — диэн Сергей Черкашин СИА-ҕа кэпсээтэ.

60 саастаах киһи сүрэх-тымыр ыарыытынан киин балыыһаҕа диспансернай учуокка турар эбит. Билигин кини туруга үчүгэй, балыыһаттан тахсыбыт.

— Мин туох эрэ улахан дьыаланы оҥордум дии санаабаппын, наадалаах кэмҥэ аттыгар баар буоллаҕым дии. Быраастарга ол ытык иэспит буолар, — диэн Сергей Черкашин этэр.

Кини бэйэтин дьоруой курдук санаммат. Чахчы, быраас үйэтин тухары дьон олоҕун быыһыыр. 2016 сыллаахха Тиксии бөһүөлэгэр Ил-18 сөмөлүөт сууллубутугар кини атын быраастары кытта эмсэҕэлээбиттэргэ  бастакы көмөнү оҥорбута.