Быраастар аан бастакытын бэйэлэрэ кохлеарнай имплантацияны оҥордулар

Саха сирин доруобуйа харыстабылын историятыгар аан бастакытын олохтоох миэдиктэр бэйэлэрэ  үрдүк технологиялаах эпэрээссийэни оҥордулар — кохлеарнай имплантацияны.

Быраас үрдүк истиэпэннээх икки кулгааҕынан үчүгэйдик истибэт 18 саастаах ыарыһаҕы  эпэрээссийэлээтэ. Эпэрээссийэни өрөспүүбүлүкэ уопуттаах отохирург бырааһа, СӨ 2-с №- дээх балыыһа ЛОР отделын  сэбиэдиссэйэ Иннокентий Александров салайан ыытта. Киниэхэ анестезиолог-реаниматолог Гаврил Сивцев, медбыраат-анестезист уонна операционнай медсиэстэрэ эдьиийдэрэ көмөлөстүлэр. Саха сиригэр кохлеарнай имплантацияны өссө 2018 сылга киллэрбиттэрэ. Ол эрээри, бу эпэрээссийэни федеральнай клиникалар отохирургтарын салалталарынан  эрэ оҥороллоро.