Быраастар бүтүн Арассыыйатааҕы куонкурустара саҕаланыа

Арассыыйа Доруобуйа харыстабылыгар министиэристибэтэ иһитиннэрбитинэн, быраастар уонна мэдиссиинискэйэ суох үрдүк үөрэхтээх исписэлиистэр, ону сэргэ  “Орто мэдиссиинискэй уонна фармацевтическай үөрэхтээх бастыҥ исписэлиис” Бүтүн Арассыыйатааҕы куонкурустар  саҕаланыахтара.

Куонкуруска быраастар уонна исписэлиистэр үлэлиир кэлэктииптэрэ түһэрэллэр, ону сэргэ бэйэ түһэриниэн эмиэ сөп.

2023 сыллааҕы  куонкурус үс түһүмэҕинэн ыытыллар:

-2023 сыл муус устар 1 күнүгэр диэри мэдиссиинискэй тэрилтэлэргэ ыытыллар. Тэрилтэлэр хандьытааттары талаллар;

-Муус устар 1-30 күннэригэр доруобуйа харыстабылын эйгэтигэр судаарыстыбаннай былаас федеральнай уорганнарын, РФ субъектарын судаарыстыбаннай былааһын уорганнарын куонкуруска хамыыһыйалара тэриллэллэр;

-Үһүс түһүмэҕи ыам ыйын 1 күнүттэн куонкурус киин хамыыһыйата ыытар.

Бүтүн Арассыыйатааҕы куонкурус кыайыылаахтарыгар харчынан бириэмийэ ананар.