Быраастар Докучаевскайга 870 эпэрээссийэни оҥордулар
Саха сирин быраастара Донецкай Өрөспүүбүлүкэ Докучаевскай куоратыгар үлэлээн саҕалыахтарыттан барыта 874 эпэрээссийэни оҥордулар. Бу туһунан доруобуйа харыстабылын министиэристибэтин үлэһитэ Лилия Анкушева брифиҥҥэ кэпсээтэ.
— Анал байыаннай дьайыы саҕаланыаҕыттан, Ил Дархан сорудаҕынан, Саха сирин быраастара эйэлээх олохтоохторго мэдиссиинэ көмөтүн оҥороллор. 2024 сыл кулун тутар ыйыттан Докучаевскайга саха быраастарын биригээдэтэ тохтоло суох үлэлиир. Кинилэр барыта 874 эпэрээссийэни, ол иһигэр, хирурдар, травматологтар — 591, офтальмологтар — 283 эпэрээссийэни оҥордулар. Быраастар киин балыыһа исписэлиистэрин кытта уопуттарын үллэстэллэр, — диэн Лилия Анкушева кэпсээтэ.
Доруобуйа харыстабылын министиэристибэтэ иһитиннэрбитинэн, бүгүҥҥү күҥҥэ анал байыаннай дьайыы 3701 кыттааччытыгар мэдиссиинэ көмөтө оҥоһулунна. Ол иһигэр, амбулаторияҕа — 2261, сытар балыыһаҕа — 810 байыас эмтэннэ. 330 бэтэрээн мэдиссиинэ реабилитациятын, 652 байыас психотерапевтическай, психологическай көмөнү ылла. 285 байыаннай сулууспалаах Москваҕа «Бэс Чагда» сонотуоруйга эмтэннэ.
Байыастар дьиэ кэргэттэригэр — 4365 киһиэхэ мэдиссиинэ көмөтө оҥоһулунна.
Ил Дархан, бырабыыталыстыба пресс-сулууспата.
Сообщить об опечатке
Текст, который будет отправлен нашим редакторам: