Быраастар үһүс этээстэн сууллубут оҕону быыһаатылар

Ыам ыйын 4 күнүгэр Бүлүүгэ биир саастаах кыыс оҕо үһүс этээстэн аспаалга сууллубута. Кыысчааны тута Бүлүү оройуоннааҕы балыыһатын реанимациятыгар госпитализациялаабыттара, саахал мэдиссиинэтин кииниттэн биригээдэни ыҥырбыттара. Бу туһунан СӨ Доруобуйа харыстабылын министиэристибэтигэр иһитиннэрдилэр диэн СИА суруйар.

Бүлүү оройуоннааҕы балыыһатын быраастара кыыска суһал көмөнү оҥорон, лучевой диагностика кэнниттэн төбөтүн уҥуоҕар, мэйиитигэр улахан эчэйиилэри ылбытын быһаарбыттар. Суһал эпэрээссийэ оҥорорго Эдьигэээнтэн саахал мэдиссиинэтин киинин миэдикэтэрэ — нейрохирург, анестезиолог-реаниматолог уонна биэлсэр кэлбиттэр.

Кыысчааҥҥа нейрохирургическай эпэрээссийэни уопуттаах нейрохирург-быраас Семен Сивцев оҥорбут.

Эпэрээссийэ кэнниттэн кыыс туруга бигэтийбит, онон Дьокуускайга санрейсинэн Өрөспүүбүлүкэтээҕи 1-кы №-дээх балыыһаҕа — М.Е.Николаев аатынан Мэдиссиинэй национальнай киинигэр аҕалбыттар.

Доруобуйа министиэристибэтигэр бэлиэтээбиттэринэн, саахал мэдиссиинэтин киинин быраастарын үлэлэрэ олус улахан ноҕуруускалаах уонна идэтийиини ирдиир суһал түбэлтэлэрдээх. Эдьигээҥҥэ быраастар ыараханнык эчэйбит эр киһини суһаллык эпэрээссийэлээбиттэр, онтон нейрохирург-быраас Семен Сивцев Бүлүүгэ үлэлээн баран, Дьокуускайынан Мэҥэ Хаҥаласка уустук эпэрээссийэни оҥоро тиийбит.