Бырааттыы-балтылыы Большаковтар — дуобакка аан дойдутааҕы Куубагын кыайыылаахтара

Турцияҕа алта дойдуттан 60-ча спортсмен кыттыылаах нуучча дуобатыгар аан дойдутааҕы Куубага түмүктэннэ.

Кинилэр ортолоругар 10 норуоттар икки ардыларынааҥы гроссмейстердар уонна 8 норуоттар икки ардыларынааҕы маастардар кытыннылар. Ол курдук, аан дойду Куубагын кыайыылаахтарынан Саха сириттэн бырааттыы-балтылыы Алексей уонна Елена Большаковтар буоллулар. Ол туһунан «Триумф» успуорт уораҕайын пресс-сулууспатыгар иһитиннэрдилэр. Күрэхтэһии эр дьоҥҥо, дьахталларга, юниордарга уонна юниоркаларга ыытылынна. Бириис пуондата — 2400 кэриҥэ евро. Турнирга үчүгэй түмүктэри Саха сирин сүүмэрдэммит хамаандатын оонньооччулара көрдөрдүлэр.

Чаҕылҕанныы оонньууга дьахталлар ортолоругар боруонса мэтээли Дайаана Кондратьева ылла. Эдэрдэргэ аан дойду Куубагын кыайыылаахтарынан Айсен Егоров уонна Юлия Никанорова буоллулар. Алексей Большаков үрүҥ көмүс призерунан, оттон Саяника Кондратьева боруонса призерунан буолла.

Турнир чэрчитинэн бразильскай системанан чаҕылҕанныы оонньууга эмиэ кытыннылар. Манна дьахталларга бастакы миэстэни Алена Большакова ылла, оттон юниордарга — Юлия Никанорова. Бу дьиссипилиинэҕэ Алексей Большаков уонна Саяника Кондратьева иккис миэстэ буоллулар. Түргэн оонньууга аан дойду Куубагын кыайыылаахтарынан Алексей уонна Елена Большаковтар буоллулар. Ол курдук, дуобакка дьиэ кэргэнинэн Большаковтар аан дойду түһүлгэтигэр улахан ситиһиилэннилэр. Бу бырагыраамаҕа Айсен Егоров (эр дьон) уонна Саяника Кондратьева (юниордар) боруонса наҕараадалары туттулар.