Бырааттыы Ноговицыннар бириистэригэр XX үбүлүөйдээх турнир бастыҥ хапсаҕайдьыттары түмүөҕэ

Дьокускайга сэтинньи 22-23 күннэригэр «Модун» успуорт уораҕайыгар  хапсаҕайга бырааттыы Ноговицыннар бириистэригэр XX үбүлүөйдээх өрөспүүбүлүкэтээҕи турнир ыытыллыаҕа. Быйылгы күрэхтэһии 20-с төгүлүн буолар. Тэрээһин Дьааҥы оройуона төрүттэммитэ 95 сылын үбүлүөйүнэн 300 кэриҥэ күрэсчити түмэрэ күүтүллэр.

Тустууктар ортолоругар алта ыйааһыҥҥа мэтээллэр оонньоноллор. Чөмпүйүөннэр 50-нуу тыһ. солк., үрүҥ көмүс призердар – 15 тыһ. солк., боруонса призердар – 10 тыһ. солк., оттон төрдүс миэстэни ылбыттар – 5 тыһ.солк. ылыахтара.

Оттон 75 киилэҕэ диэри уонна 75 киилэттэн үөһэ ыйааһыннарга абсолютнай кыайыылаахтарга 100-түү тыһыынча солкуобайы уонна бөрө тириитин туттарыахтара.

Маны таһынан анал бириистэр бастыҥ тустуукка, бастыҥ быраҕыы иһин, бастыҥ судьуйаҕа уонна бастыҥ үөһээ дьааҥылыы тустуукка туттарыллыахтара.