Бырабыыталыстыба Алдан олохтоохторун иннигэр отчуоттаата

Алдан куоракка СӨ Бырабыыталыстыбатын түмүк отчуота буолла. Мунньахха оройуон социальнай-экэнэмиичэскэй сайдыытын түмүктэрэ оҥоһулуннулар.

Олохтоохтор иннилэригэр СӨ Бырабыыталыстыбатын Бэрэссэдээтэлэ Кирилл Бычков тыл эттэ. Кини өрөспүүбүлүкэ уонна Алдан оройуонун экэниэмикэтэ улахан бырамыысыланнай эбийиэктэр үлэҕэ киирэллэринэн салгыы бөҕөргүү турарын бэлиэтээтэ.

Бырамыысыланнас көрдөрүүтэ үрдээһинигэр «Хвойное» көмүһү хостооһун фабриката уонна Токкинскай миэстэтин баһылааһын улахан кылааты киллэрэллэр. Бырайыактар саҥа үлэ миэстэлэрин үөскэтэллэр. Сайдыылаах бырамыысыланнай сектор былыргыттан Алдан оройуонун үбүнэн-харчытынан хааччыйар. Олохтоох бүддьүөт  дохуоттара муниципальнай тэриллиигэ туруктаах буолууну харыстыыры уонна социальнай эйгэҕэ, инфраструктураҕа бырайыактары кэмиттэн кэмигэр олоххо киллэрэри көҥүллүүллэр.

Отчуот кэмигэр нэһилиэнньэни социальнай өйөөһүн миэрэлэригэр туһаайан ураты болҕомто уурулунна. Социальнай дуогабардар, инбэлиит дьоҥҥо көмө, тулаайах оҕолору дьиэнэн хааччыйыы уонна уустук балаһыанньалаах дьоҥҥо аадырыстаах өйөбүл тыһыынчанан ыалларга тирэх буоллулар. Алдан оройуона олохтоохтор олоҕун хаачыстыбатын үрдэтиигэ туһуламмыт бары социальнай бырагыраамаларга кыттар.

«Ити олус улахан үлэ, барыгытыгар улахан махталбын тиэрдиэхпин баҕарабын», — диэн Кирилл Бычков бэлиэтээтэ.

Үөрэх эйгэтигэр Алдан оройуона үрдүк көрдөрүүнү тутуһар. Үөрэнээччилэр ситиһиилэрин уонна выпускниктар үрдүк үөрэххэ киириилэрин инники күөҥҥэ таһаарар көрдөрүүлэрин бэлиэтээтилэр, педагогтар каадыр кыаҕын сайыннарыыга уонна үөрэх инфраструктуратын саҥардыыга систиэмэлээх үлэни ыыталлар.

Территория сайдыытын кэскилин туһунан кэпсииригэр, Бырабыыталыстыба Бэрэссэдээтэлэ оройуоҥҥа туризм кыахтарын бэлиэтээтэ. Алдан оройуона Саха сирин соҕуруу өттүгэр туризм сайдыытыгар ураты кыах биэрэр. Территория саҥа туристическай бородуукталары айыыга уонна турист ахсаанын элбэтиигэ көхтөөхтүк кыттыһыаҕа.

Саха сирэ Уһук Илиҥҥэ социальнай гаастааһыҥҥа  — лидер. Алдан оройуонугар гаастааһын алта нэһилиэнньэлээх пууну хабыаҕа: Алдан, Ленинскэй, Лебединэй, Үөһээ Кураанах, Аллараа Кураанах уонна Хатыстыыр. Отчуот кэмигэр дьиэ тутуутун сайдыыта эмиэ бэлиэтэннэ. Уһук Илиҥҥэ арендаҕа бэриллэр дьиэлэр бырагырааматын чэрчитинэн Саха Сиригэр  кыбартыыра лимитэ 850-ттан 1003-кэ диэри улаатыннарыллыбыт. Дьокуускайга, Мииринэйгэ, Нерюнгрига уонна Алдаҥҥа аҕыс бырайыак сөбүлэһилиннэ, Алдаҥҥа эбийиэктэр тутуулара 50%-тан тахсаҕа тиийбит.