Бырабыыталыстыба чилиэннэрин бастакы мунньаҕа буолла

Бүгүн Бырабыыталыстыба саҥа састааба бастакы мунньаҕын ыытта.

Тэрээһини Бырабыыталыстыба Бэрэссэдээтэлэ Кирилл Бычков салайан ыытта. Бырабыыталыстыба чилиэннэрин мунньаҕын Ил Дархан Айсен Николаев арыйда. Кини байыаннай иэһин толоро сылдьан сырдык тыынын толук уурбут Арассыыйа Дьоруойа Дмитрий Егоровка кутурҕан мүнүүтэтин биллэрдэ.

Айсен Сергеевич байыаннай дьайыы кыттыылаахтара уонна кинилэр кэргэттэрэ бырабыыталыстыба уонна муниципальнай былаас болҕомтотугар сылдьыахтаахтарын бэлиэтээтэ.

СӨ Ил Дарханын уонна Бырабыыталыстыбатын пресс-сулууспата иһитиннэрбитинэн, СӨ Ил Дархана миниистирдэр кэбиниэттэрин бастакы мунньаҕа – бэлиэ түгэн буоларын, бу састаап үлэ уопутун учуоттаан тэриллибитин бэлиэтээтэ: «Эһиэхэ өрөспүүбүлүкэбит сайдыытын туһугар бэйэҕит тус кылааккытын киллэрэргитигэр кыаҕы биэрдибит. Дьон олоҕо бигэ туруктаах буолуута – бу эһиги үлэҕит көрдөрүүтүнэн уонна түмүгүнэн буолуоҕа. Эһиэхэ ылыммыт дьыалаҕытын кэмигэр ситэрэн, ситиһиилэнэн иһэргитигэр баҕарабын. Бу инниннээҕи састаап курдук Саха сирэ социальнай-экэнэмиичэскэй сайдыытыгар дьоһуннаах кылааккытын киллэрэргитигэр эрэнэбин, — диэн бэлиэтээтэ Айсен Николаев.

Ил Дархан СӨ Бырабыыталыстыбатын Бэрэссэдээтэлин солбуйааччыларыгар уонна бырабыыталыстыба чилиэннэригэр түөскэ кэтэр бэлиэни уонна Судаарыстыбаннай  дуоһунастаах дьон этикаларыгар уонна сулууспаларыгар сыһыаннаах кодексы  туттарда.