Бырабыыталыстыба оҕолоох дьиэ кэргэттэргэ өйүүр дьаһалларын салгыы сайыннарыаҕа

Дойду Бырабыыталыстыбата элбэх оҕолоох дьиэ кэргэттэри өйүүр дьаһалларын салгыы сайыннарарга ураты болҕомтотун ууруоҕа диэн Арассыыйа премьер-миниистирэ Михаил Мишустин муус устар 3 күнүгэр Госдумаҕа Бырабыыталыстыба 2023 сылга ыыппыт үлэтин отчуотун кэмигэр иһитиннэрдэ.

«Бэрэсидьиэн туруорбут сүрүн соруга, ол иһигэр быйылгы сылга, норуоту харыстааһын буолар. Судаарыстыба баһылыга биллэрбит Дьиэ кэргэн сылыгар биһиги салгыы оҕолоох дьиэ кэргэттэри өйүүр дьаһаллары тупсарыахпыт. Ордук күүскэ, биллэн турар, элбэх оҕолоохтору. Федеральнай таһымҥа кинилэр биир кэлим ыстаатыстара уонна социальнай мэктиэлэрэ олохтоммуттара – бу дойду үрдүнэн барыта биир ситимнээх», — диэтэ Михаил Мишустин.

Бэлиэтээн эттэххэ, бу иннинэ Ил Дархан Айсен Николаев Саха сиригэр үс саҥа дьаһаллар ылыллыахтара диэн эрэннэрбитэ. Саҥа уларыйыылары киллэрии Саха сиригэр элбэх оҕолоох ыаллар үөрэнээччилэрин итии аһылыгынан хааччыйыаҕа, элбэх оҕолоохтору уопсастыбаннай тырааныспарга босхо айаннатыаҕа, үс уонна онтон элбэх оҕолоохтору хомунаалынай өҥө төлөбүрүгэр чэпчэтиилэри үлэлэтиэҕэ.