Бырабыыталыстыба отчуота Хаҥаласка саҕаланна

Хаҥалас улууһун дьоно-сэргэтэ өрөспүүбүлүкэҕэ ааспыт сылга ыытыллыбыт үлэни-хамнаһы билээри сэргэхсийдилэр. Бөлөҕү СӨ Бырабыыталыстыбатын Бэрэссэдээтэлин солбуйааччы Анатолий Семенов салайар. 

Бүгүн өрөспүүбүлүкэҕэ 2023 сылга ыытыллыбыт үлэ-хамнас туһунан сиһилии Тумул, Чкалов олохтоохторо иһиттилэр. Салгыы кэпсэтиигэ көхтөөхтүк кытыннылар. Сарсын Улахан Ааҥҥа, Өктөмҥө, Төхтүргэ дьону-сэргэни көрсөн кэпсэтэр, туруорсууларын истэр, кыһалҕаны быһаарсар былаан баар. Оттон олунньу 22  күнүгэр Мохсоҕоллоох олохтоохторо үлэ-хамнас туһунан сиһилии билсиэхтэрэ, ыйытыыларын биэриэхтэрэ. Түмүк Покровскай куоракка буолуоҕа. Көрсүһүүлэргэ олохтоохтор ыйытыыларын биэрэллэр, санааларын үллэстэллэр уонна туруорсууларын этэллэр.

Хаҥалас улууһугар отчуоттуур бөлөххө СӨ доруобуйа харыстабылын миниистирин бастакы солбуйааччы Дмитрий  Сергин, экэниэмикэ миниистирин солбуйааччы Иван Елисеев, үөрэх уонна наука миниистирин солбуйааччы Виктория Захарова, уо.д.а. бааллар.

Судаарыстыбаннай былаас уорганнара нэһилиэнньэҕэ аһаҕас буолуулара, олохтоохтору кытары сибээһи хардарыта ситимнээхтик туталлара, судаарыстыба үлэтигэр көдьүүстээх буоларын Арассыыйа Бэрэсидьиэнэ Владимир Путин бэлиэтээн турар.

СӨ Ил Дарханын уонна бырабыыталыстыбатын пресс-сулууспата