Бырабыыталыстыба отчуота Ньурба улууһугар саҕаланна

Бүгүн, олунньу 18 күнүгэр, Ньурба улууһугар СӨ Бырабыыталыстыбата ааспыт сыллааҕы үлэтин отчуота саҕаланна.

Вице-премьер Георгий Степанов салайааччылаах оробуочай бөлөх үс хос бөлөххө арахсан үлэлиир, былааннаммытынан 21 нэһилиэнньэлээх пууҥҥа сылдьыахтаах. Үс күн үлэлиэхтэрэ, түмүк отчуот Ньурба куоратыгар буолара күүтүллэр.

Бастакы хос бөлөҕү СӨ Бырабыыталыстыбатын Бэрэссэдээтэлин солбуйааччы Георгий Степанов салайан илдьэ сылдьар. Иккиһи СӨ тыа хаһаайыстыбатын уонна ас-үөл бэлиитикэтин миниистирэ Артем Александров, үсүһү СӨ физическэй култууратын уонна успуордун миниистирин бастакы солбуйааччы Гаврил Мохначевскай салайаллар.

Санатан эттэххэ, СӨ Бырабыыталыстыбатын отчуота быйыл олунньу 3 күнүттэн саҕаламмыта уонна кулун тутарга түмүктэниэхтээх. Саха сирин олохтоохторо ыйытыыларыгар толору хоруйдары ылар кыахтаахтар. Түмүктэр «Саха» НКИХ ханаалыгар тахсыахтара.

Кыраапыгы сиһилии бу сигэнэн киирэн көрүөххэ сөп:https://www.sakha.gov.ru/news/front/view/id/3480409

СӨ Ил Дарханын уонна Бырабыыталыстыбатын пресс-сулууспата