Ньурба улууһа — дьарыктаах буолууга биир бастыҥ улуус

Саха Өрөспүүбүүлүкэтин судаарыстыбаннай былааһын ситэриилээх уорганнарын отчуота Ньурба улууһугар олунньу 18 күнүттэн саҕаланна.

Оробуочай бөлөҕү СӨ Бырабыыталыстыбатын бэрэссэдээтэлин солбуйааччы Георгий Михайлович Степанов салайар.
Ону сэргэ ньурбалар биир дойдулаахтара, СӨ Судаарыстыбаннай мунньаҕын (Ил Түмэн) ыччат дьыалатыгар, физическэй култуураҕа уонна успуорка сис кэмитиэтин бэрэссэдээтэлэ Георгий Русланович Балакшин кытынна. Ньурба улууһун баһылыга Алексей Михайлович Иннокентьев уонна улуус тэрилтэлэрин сүрүн үлэһиттэрэ эмиэ тустаах ыйытыыларга хоруйдаатылар.

Отчуот үс бөлөҕүнэн улуус ыраах сытар нэһилиэктэриттэн: Хатыыттан, Быһыттаахтан, Дьаархантан, Маалыкайтан, Ньурбачаантан саҕаланна.

СӨ тыа хаһаайыстыбатын миниистирэ Артем Александрович Александров уонна СӨ физическэй култуураҕа уонна успуорка миниистирин бастакы солбуйааччы Гаврил Михайлович Мохначевскай салайааччылардаах иккис-үһүс бөлөхтөр атын нэһилиэктэргэ отчуоттаатылар. Нэһилиэнньэни кытары аһаҕас кэпсэтии, отчуот РФ уонна СӨ Өрөгөй ырыаларыттан саҕаланна.

Георгий Михайлович 2024 сыллааҕы сүрүн көрдөрүүлэри бэлиэтииригэр Ньурба улууһун көрдөрүүлэригэр тохтоото.

-Үөдэй с. оскуола-уһуйаан дьиэтэ аһылынна;
— Ынахсыкка уһуйаан аһылынна;
— Ньурбатааҕы техникум дьиэтэ өрөмүөннэннэ;
— Ньурба улууһа дьарыктаах буолуу көрдерүүтүгэр биир бастыҥ улууска киирсэр;
— «Агростап» бырагырааманан саҥа саҕалыыр пиэримэрдэргэ 8 мөл. курдук суумалаах Грант бэрилиннэ:
— тыа хаһаайыстыбата 516,7 мөл. солк. үбүлэннэ;
— Маалыкайга сылгы базатын тутууга судаарыстыба өҥөтө оҥоһулунна уо. д. а.

Отчуот бастакы күнэ нэһилиэнньэ өттүттэн олус көхтөөхтүк барда, ситэриилээх былаас отчуотун биһирииллэрин биллэрдилэр.

(Сиһилии — хаһыат 21 күннээҕи нүөмэригэр)

Ааптар хаартыскаларга түһэриитэ