Бырабыыталыстыба отчуота олунньу 2 күнүттэн саҕаланыаҕа

Олунньу 2 күнүттэн  Саха сиригэр бырабыыталыстыба отчуота үгэс быһыытынан, сирэй көрсөн ыытыллыаҕа.  Көһө сылдьар мунньахтарга  бырабыыталыстыба бэрэссэдээтэлэ  Кирилл Бычков, бэрэссэдээтэл бастакы солбуйааччылара Дмитрий Садовников уонна  Дьулустаан Борисов, итиэннэ солбуйааччылар Ольга Балабкина, Сергей Местников, Анатолий Семёнов, Георгий Степанов кыттыыны ылыахтара.

Отчуот кулун тутар саҥатыгар диэри ыытыллыаҕа. Салайааччылар миэстэтигэр олохтоохтору кытары көрсөн кэпсэтиэхтэрэ, ыйытыыларга хоруйдуохтара, ааспыт сыллааҕы отчуоту оҥоруохтара. Муниципальнай тэриллиилэргэ сырыы кэмигэр гражданнары кытары тус көрсүһүүлэр буолуохтара уонна социальнай эбийиэктэри көрүөхтэрэ.

«Быһа кэпсэтии» биэриигэ өрөспүүбүлүкэ баһылыга Айсен Николаев,  ыраах сытар нэһилиэнньэлээх пууннар олохтоохторо бырабыыталыстыба бэрэстэбиитэллэрин кытта сирэй көрсөн кэпсэтэр кыаҕы сыаналыылларын, оттон видео-отчуоттар, хомойуох иһин, итинник кыаҕы биэрбэттэрин бэлиэтээн эппитэ.

Бырабыыталыстыба отчуота   Муома оройуонугар олунньу 2-6 күннэригэр ыытыллыаҕа. Олунньу 3 — 5  күннэригэр Үөһээ Халымаҕа, олунньу 5 — 6 күннэригэр  Горнайга, олунньу  7 -12 күннэригэр Кэбээйигэ,  олунньу  9 — 11 күннэригэр  Нерюнгрига, олунньу  9 — 12 күннэригэр Үөһээ Бүлүүгэ уонна Эбээн Бытантайга, олунньу  9 — 10  күннэригэр   Мииринэйгэ, олунньу  11 — 13 күннэригэр Ленскэйгэ,   Тааттаҕа, Анаабырга, олунньу  11  — 14 күннэригэр Аллайыахаҕа,  олунньу  12 — 15 күннэригэр  Алдан оройуонугар буолуоҕа.

Олунньу иккис аҥаарыгар, 16 — 19 күннэригэр — Эдьигээн,  16 — 21 күннэригэр — Өлүөхүмэ,   16 — 20  күннэригэр — Ньурба,  17  — 20 күннэригэр — Өймөкөөн, Усуйаана, Мэҥэ Хаҥалас, 17 — 21  күннэригэр — Орто Халыма, 18 — 20  күннэригэр — Хаҥалас,  18 — 21 күннэригэр  —  Томпо олохтоохторун иннигэр отчуоттуохтара.

Олунньу  19 — 22  күннэригэр Бүлүүгэ,  17 — 19 күннэригэр Сунтаарга,  20 — 27 күннэригэр Үөһээ Дьааҥыга,   23 — 26  күннэригэр Булуҥҥа, оттон Өлөөҥҥө,  24 — 26 күннэригэр Чурапчыга, Уус Алдаҥҥа, 25 — 27 күннэригэр Намҥа, Уус Маайаҕа, 25 — 28 күннэригэр Аллараа Халымаҕа буолуоҕа. Олунньу  26 күнүгэр  «Жатай» куорат уокуругун олохтоохторо  ситэриилээх былаас  отчуотун истиэхтэрэ.

Кулун тутар 5 күнүгэр отчуот Дьокуускай куоракка, итиэннэ  кулун тутар 2 — 6  күннэригэр  Абый улууһугар,   2 — 4  күннэригэр Амма улууһугар ыытыллыаҕа.