Бырабыыталыстыба отчуота олунньуттан саҕаланыаҕа

Олунньуттан Саха сиригэр бырабыыталыстыба отчуота саҕаланыаҕа. Отчуоттар үгэс быһыытынан, сирэй көрсөн ыытыллыахтара диэн «Быһа кэпсэтии» биэриигэ өрөспүүбүлүкэ баһылыга Айсен Николаев иһитиннэрдэ.

«Быйыл ситэриилээх былаас нэһилиэнньэҕэ отчуоттара урукку курдук көрүҥүнэн салҕанан барыахтара. Олунньу 4 күнүттэн саҕаланан, кулун тутар ый бырааһынньыгын иннинэ  түмүктэниэхтэрэ», — диэтэ Айсен Николаев.

Кини этэринэн, ыраах сытар нэһилиэнньэлээх пууннар олохтоохторо бырабыыталыстыба бэрэстэбиитэллэрин кытта сирэй көрсөн кэпсэтэр кыаҕы сыаналыыллар, оттон видео-отчуоттар, хомойуох иһин, итинник кыаҕы биэрбэттэр.

«Дьон чахчы киэҥ тиэмэни ырытыан баҕарар: норуоттар икки ардыларынааҕы дьыалалартан саҕалаан, өрөмүөн боппуруостарыгар тиийэ. Ол сөп», — диэн Ил Дархан бэлиэтээтэ.

Ону тэҥэ, ситэриилээх былаас уорганнарыттан норуокка сыллааҕы отчуоттар идиэйэлэрэ Саха сирин бастакы бэрэсидьиэнигэр Михаил Николаевка сыһыаннааҕын уонна 1999 сылтан олоххо киирэрин санатта.