Бырабыыталыстыба отчуота Роман Дмитриев дойдутугар үтүө сонуннартан саҕаланна

Сүүстэн тахса нэһилиэнньэлээх Бэстээх сэлиэнньэтин олохтоохторугар Саха Өрөспүүбүлүкэтин ситэриилээх былааһын уорганнарын отчуота үтүө сонуннартан саҕаланна.

Ол курдук, Эдьигээн улууһун Бэстээх сэлиэнньэтин  олохтоохторо  быйыл кыһыҥҥы суол үчүгэйдик оҥоһуллубутун, биэлсэр-акушер пууннаммыттарын уонна оптоволокно тардыллан, суотабай сибээстэммиттэрин бэлиэтээтилэр, СӨ Ил Дархана Айсен Николаевка, бырабыыталыстыбаҕа махталларын эттилэр. Ону тэҥэ хас да сылы быһа күүппүт хочуолунайдара быйыл үлэҕэ киллэриллиэхтээх.

Ол эрээри, суотабай сибээс ардыгар тоҕо сүтэн ыларын, үчүгэйдик хаппатын, «барбат да, кэлбэт да» буолан хааларын туоһуластылар.
СӨ инновацияҕа, сыыппараны сайыннарыыга уонна инфокоммуникационнай технологияларга миниистири бастакы солбуйааччы Петр Николаев суотабай сибээскэ сыһыаннаах боппуруостарга хас биирдии нэһилиэккэ буолбут көрсүһүүгэ хардарда. Петр Васильевич уот бардаҕына, сибээс эмиэ атахтанарын бэлиэтээн туран, халлаан сылыйдаҕына, үлэ өссө салҕанан,   бэс ыйыгар түмүктэниэхтээҕин туһунан иһитиннэрдэ.  Быйыл улуус уонна нэһилиэктэр баһылыктарын кытары 4G сибээһи холбооһун боппуруоһун үөрэтиэхтэрэ. 4G баазатын тутууга 3 мөлүйүөн курдук үп ирдэниллэр, «Билайн» хампаанньаны кытары дуогабар түһэрсиэххэ сөп.
Бэстээхтэр бэнсиининэн ситэри хааччыллыбаттарын, онон АЗС-ка наадыйалларын туһунан эттилэр. Ол эрээри, нэһилиэнньэ «Саханефтегазка» иэстээх олорор. Дмитрий Садовников кулун тутар 15 күнүгэр диэри Бэстээххэ бэнсиини аҕаларга эрэннэрдэ.
Отчуоттуур бөлөх бүтэһик нэһилиэгэр Бэстээххэ сайыҥҥы айан-сырыы кыһалҕата уонна сыаната ыарахана эмиэ таарылынна.

«Сайын «Аржаков» борохуот сылдьара үчүгэй. Ол эрээри, олорон айанныыр  миэстэҕэ хаһан да тиксибэппит», -– диэн эбии уу тырааныспарыгар наадыйалларын туһунан эттилэр. Онуоха СӨ тырааныспарка уонна суол хаһаайыстыбатыгар миниистири солбуйааччы Семен Коркин «Ломоносов» суудуна өрөмүөннэнэн кэлиэхтээҕин санатта.
Олохтоохтор аһынан-үөлүнэн хааччыйан олорор урбаанньыттара  Евгений Андреевка махтаннылар уонна киниэхэ туох эмэ көмө, өйөбүл баар буоларыгар баҕа санааларын эттилэр. Маҕаһыын аһын-үөлүн арааһа элбэх буолан, Бэстээх маҕаһыыныттан атыылаһа Баахынайтан эмиэ кэлэллэр.
Бэстээх олохтооҕо Зинаида Николаева биэлсэр-акушер пууна аһыллыбытыгар олус махтанан туран: «Биэлсэр-акушер пуунугар сытан эрэ эмтэнэр кыах баара буоллар, өссө абыраныа этибит», — диэн баҕа санаатын үллэһиннэ.

СӨ доруобуйа харыстабылын миниистирин солбуйааччы Надежда Федорова сытар балыыһалары тэрийэргэ олус элбэх үп ирдэнэрин, биэлсэр-акушер пуунугар балыыһаны арыйар көҥүллэммэтин быһаарда. Манна сыһыаран эттэххэ, өрөспүүбүлүкэ быраастарын мобильнай биригээдэлэрэ кэлэр буоланнар, нэһилиэнньэ доруобуйатын көрдөрүнэн абыраммыт.

«Сытар балыыһаны тэрийэргэ элбэх үп-харчы, мэдиссиинэ тэрилэ наадалар. Онон, ыллыҥ да балыыһаны арыйар кыах билиҥҥитэ суох. Тоҕо диэтэххэ, элбэх үлэһит наада, анестезиология отделениета баар буолуохтаах.
Мин Бырабыыталыстыба отчуотугар былырыын эмиэ сылдьыбытым, онтон олус үөрэбин, нэһилиэнньэ настарыанньата өрө көтөҕүллүбүтүн   бэлиэтии көрөбүн. Тоҕо диэтэххэ, Ил Дархаммыт Айсен Николаев көҕүлээһининэн тэриллибит «Мобильнай дуоктардар» бырайыак үлэлээн, былырыын эһиэхэ хаста да кэлэ сылдьыбыттара. Быйыл эмиэ былаан быһыытынан, түөртэн итэҕэһэ суох кэлиэхтэрэ. Бары үөрүйэхтээх быраастар кэлэллэр, эһиги да кинилэр кэлэллэригэр үөрэннэххит буолуо. Бу нэдиэлэҕэ Дьокуускайтан стоматология биригээдэтэ кэлэн үлэлээн барда. Ити эмиэ үөрүүлээх түгэн. Сотору психоневрология диспансерын  быраастарын биригээдэ кэлиэхтээх. Быраастар, доруобуйа харыстабылын орто сүһүөх үлэһиттэрэ, төһө кыалларынан, көһө сылдьар тэриллэрин илдьэ сылдьаллар. Сүрүнэ — мобильнай дуоктардар биир эрэ сырыынан муҥурдамматтар, ханнык эмэ ыарыыны буллахтарына, учуокка ылаллар, Эдьигээҥҥэ эбэтэр куоракка кэлэн эбии  көрдөрүөххэ наада буолар», — диэн Надежда Тимофеевна   нэһилиэнньэни кытары көрсүһүүлэр дьон олоҕо тупсарыгар наадалаахтарын ыйда.

СӨ үлэҕэ уонна социальнай сайдыыга миниистирэ Елена Волкова: «Киин сылытыыга холбонорго субсидия ыларга дьиэ кэргэн кыра дохуоттаах буолуо суохтаах. Ол гынан баран, дьиэ кэргэн биирдэ итинник көмөнү ылан сылытыыга холбоноругар тугу оҥоруохха сөбүн толкуйдуохпут, мин үөрэтиэм», — диэн социальнай тиэмэҕэ кэккэ боппуруостары быһаарда.

Бэстээхтэр киэн туттар киһилэрэ, Олимпиада чөмпүйүөнэ  Роман Дмитриев быйыл төрөөбүтэ 75 сылынан,  Эдьигээн сэлиэнньэтин олохтоохторун күүһүнэн испэктээк туруорбуттар. Онуоха Былатыан Ойуунускай аатынан Саха тыйаатырын артыыстара Анатолий Николаев, Михаил Апросимов сүбэ-ама буолбуттар. Сонун испэктээги сотору Покровскай, Дьокуускай дьонугар-сэргэтигэр көрдөрөр былааннаахтар.

Отчуот түмүгэр этиллибитинэн, Р.Дмитриев аатын сүгэр  Бэстээх оскуолатыгар өрөмүөн үлэтэ ыытыллыа, нэһилиэнньэ туруорсар элбэх хайысхалаах киинэ «Үтүө дьыала» бырагырааманан тутуллуон сөп. Бэстээххэ Роман Дмитриев аатынан мусуой-дьиэни тутуохтарын баҕараллара болҕомтоҕо ылылынна.

Олохтоохтор СӨ Бырабыыталыстыбатын 2023 сыллааҕы үлэтин биһирииллэрин биллэрдилэр.