Бырабыыталыстыба отчуота Үөһээ Бүлүү улууһугар саҕаланна

Бүгүн, олунньу 15 күнүгэр, СӨ Бырабыыталыстыбатын отчуота Үөһээ Бүлүүгэ үс кытыы сытар нэһилиэктэн саҕаланна. СӨ Тырааныспарка уонна суол хаһаайыстыбатыгар миниистирэ Владимир Сивцев салайааччылаах бөлөх үлэтин Маҥаас нэһилиэгиттэн саҕалаата.
Миниистир Владимир Сивцев Бырабыыталыстыба 2022 сыллааҕы үлэтин түмүгүн, Саха сирин социальнай-экэнэмиичэскэй сайдыытын сүрүн көрдөрүүлэрин туһунан кэпсээтэ.

«Өрөспүүбүлүкэ салалтатын үлэтэ экэниэмикэ саҥа усулуобуйаҕа эппиэттииригэр, дьарыктаах буолууну уонна нэһилиэнньэ дохуотун өйүүргэ дьаһаллары ылыммыта. Экэниэмикэ бигэ туругун хааччыйыы былааныгар уопсайа 16,5 млрд солкуобай кээмэйдээх 92 өйөбүл киирэр. Ол иһигэр социальнай суолталаах ас-үөл хасааһын тэрийии, күннэтэ туттуллар табаар сөптөөх сыанатын тутуһуу, таһаҕаһы кэмигэр таһыы суһал дьаһаллара ылыллыбыттара», — диэн билиһиннэрдэ миниистир.
Ол курдук байыаннай дьайыылар, демография, доруобуйа харыстабылын, тыа хаһаайыстыбатын, култуура, ойуур, о.д.а боппуруостары таарыйан отчуоттаата.
Салгыы нэһилиэнньэни кытары кэпсэтии буолла. Маҥаастар бастакынан оҕо уһуйаанын кыһалҕатын туһунан эттилэр. Иитээччи Ньургуйаана Семеновна Тимофеева 2021 с. оскуоланы кытары уһуйааны холбооннор, үлэһиккэ хааччахтааһын тахсарын, сатабыла суоҕун быһааран кэпсээтэ.

ДПО Маҥаас суолун тутуу, оҕо тэрилтэлэрин хааччыйарга фекальнай массыына, АСМ-нан хааччыйыы уонна онно анал сири быһаарарга туруорустулар.
Онуоха улуус баһылыга Владимир Поскачин итинник кыһалҕалаах 10-ча нэһилиэк баарынан, кыһалҕа сытыытык турар, онон боротокуолга киллэрэн, быһааралларыгар көрдөстө.
Нэһилиэккэ саатар биир сантехник баара буоллар диэн боппуруос турда. Аныгы ирдэбилинэн оскуола-уһуйаан толору хааччыллыылаах буолуохтаах диэн, аны онуоха сантехник курдук идэлээх үлэһит суох. Онон нэһилиэк уонна улуус дьаһалталара боротокуолга киллэрэн, Үп министиэристибэтэ итиннэ үлэлииригэр эттилэр.
Маҥаас Үөһээ Бүлүү улууһугар кытыы сытар, суола-ииһэ мөлтөх буолан суол тутуутун боппуруоһа эмиэ сытыытык турар.
Суол оҥоһуутугар быйыл 400 мөл. тыһ. тахса үп көрүлүннэ, онон бырайыаккытын киллэриэххитин сөп диэн миниистир эттэ.
Маҥаас кырдьаҕас олохтооҕо Алексей Степанович Степанов  элбэх сытыы боппуруоһу биэрдэ.

«Балбаах сокуона» эмиэ ахтылынна. Онуоха улуус баһылыга Владимир Поскачин кэтэх хаһаайыстыбалаах дьон долгуйбаттарыгар эттэ.
Маҥаастар гаастаах сир аттыгар олоробут эрээри туһаммаппыт, гаас хаһан быһаарыллар диэн Алексей Степанович Степанов  ыйытта. Миниистир Орто Түҥ гаастаах сиртэн Ньурбаҕа барар магистралга холботор былаан баарын, улуус 11 нэһилиэгин икки ардыгар барыта 145 км, нэһилиэктэр истэринэн 189 км турба тардыллара былааннанарын иһитиннэрдэ. Оччотугар бастакынан Маҥаас нэһилиэгэ гааска холбонуо.

Нэһилиэнньэ элбэх боппуруоска сөптөөх хоруйу ылла.

Мунньах түмүгүнэн Маҥаас нэһилиэгэ Бырабыыталыстыба отчуотун үчүгэйинэн сыаналаата.