Бырабыыталыстыба отчуотугар Георгий Степанов Таатта улууһугар  үлэлиир оробуочай бөлөҕү салайар

Таатта улууһугар СӨ ситэриилээх былааһын уорганнара 2025 сыллааҕы үлэлэрин түмүгүнэн отчуоттара саҕаланна.

Бырабыыталыстыба оробуочай бөлөҕүн вице-премьер Георгий Степанов салайан илдьэ сылдьар.

Үс күн устата икки бөлөххө арахсан, 14 нэһилиэнньэлээх пуун олохтоохторун кытта көрсүөхтэрэ. Бүгүн, олунньу 11 күнүгэр, Хара Алдан, Чычымах, Булуҥ, Харбалаах, Чымынаайы нэһилиэктэригэр нэһилиэнньэни кытта көрсүһүүлэр бара тураллар. Түмүк отчуот олунньу 13 күнүгэр Ытык Күөл сэлиэнньэтигэр буолуоҕа. Бырабыыталыстыба оробуочай бөлөҕүн чилиэннэрэ олохтоохтору кытта тус боппуруостарынан эмиэ көрсүөхтэрэ.

Бырабыыталыстыба оробуочай бөлөхтөрө нэһилиэнньэлээх пууннарга отчуоттуур сырыылара кулун тутар саҕаланыыта бүтүөҕэ. Түмүк “Саха” НКИК канаалларыгар тахсыаҕа, диэн иһитиннэрэр Ил Дархан, бырабыыталыстыба пресс-сулууспата.