Бырабыыталыстыба таһымыгар – Өймөкөөн улууһун сайдыыта

Бэҕэһээ, муус устар 15 күнүгэр, куйаар ситиминэн СӨ Бырабыыталыстыбатын Бэрэссэдээтэлэ Кирилл Бычков Өймөкөөн улууһун социальнай-экэнэмиичэскэй сайдыытыгар туһаайыллыбыт киэҥ ыҥырыылаах мунньаҕы ыытта.

Суолталаах мунньахха СӨ Бырабыыталыстыбатын Бэрэссэдээтэлин бастакы солбуйааччылара Дьулустан Борисов, Дмитрий Садовников, СӨ Бырабыыталыстыбатын Бэрэссэдээтэлин солбуйааччылара Анатолий Семенов, Ольга Балабкина уонна туһааннаах миниистирдэр кыттыыны ыллылар. Улуус аатыттан  “Өймөкөөн улууһа” МТ баһылыга Александр Оконешников, баһылыгы бастакы солбуйааччы Алексей Федотов, “Уус-Ньара бөһүөлэгэ” МТ баһылыга Виктория Понамарчук кытыннылар. Өрөспүүбүлүкэ бырабыыталыстыбатын эппиэттээх салайааччылара мунньахха кыттыылара тэрээһин суолтатын үрдэттэ. Бу улуустар сайдыыларыгар тустаах болҕомто уурулларын көрдөрөр, былаас араас таһымнарын икки ардыларыгар ыкса ситими көҕүлүүр.

Өймөкөөн улууһун баһылыга Александр Оконешниковтан улуус социальнай-экэнэмиичэскэй сайдыытыгар туһуламмыт мунньахха туох боппуруостар көрүллүбүттэрин сырдатарыгар көрдөстүбүт.

— Улуус социальнай-экэнэмиичэскэй сайдыытын сүрүн хайысхалара СӨ Ил Дархана Айсен Николаев 7 стратегическай ыйааҕар сөп түбэһэллэр. Улууска 9 сүрүн муниципальнай тус сыаллаах бырагыраама үлэлиир. Мунньахха Өймөкөөн оройуона сайдыытыгар туһуламмыт иһитиннэриини оҥордум. Онно сүрүн тирээн турар боппуруостарга болҕомтону туһаайдым. Бу боппуруостары ситэриилээх былаас отчуотун кэмигэр улуус олохтоохторо өрүү туруорсаллар.

2023 сыллаахха “Халыма” федеральнай суолун Уус Ньаратааҕы учаастагын оҥорууга анаан аспаал оҥорор матырыйаал собуоту улуус киинигэр туруорбуттара. Улуус салалтата уонна дьокутааттара туруорсан, бырабыыталыстыба өйөбүлүнэн бу собуот көмөтүнэн  былырыын Уус Ньараҕа биэс суол аспаалламмыта. Быйылгы сылга өссө 4 уулусса суола, ону тэҥэ тротуар уонна дьон сылдьар уопсастыбаннай сирэ аспаалланара былааннаммыта. Субсидия бэриллиитин куонкуруһа ыам ыйын бүтэһигэр ыытыллыахтаах. Маныаха улуус тэрээһин 2-с түһүмэҕэр тиийэн кыттар. Быйыл сыл бүтүүтэ бу собуоту туһааннаах тэрилтэ төттөрү ылыахтаах. Онон улуус киинин тупсарыыга туһуламмыт үлэни бу сайын собуот баарына оҥорон бүтэрэр сорук турар.

Уус Ньара бөһүөлэгин нэһилиэнньэтигэр айылҕаны тупсарыыга уонна олорорго табыгастаах усулуобуйаны тэрийиигэ канализацияны ыраастыыр эбийиэктэри тутуу биир сүрүн соругунан буолар. 2025 сылга үлэни саҕалыырга уонна модульнай оборудование фундаменын тутар бэдэрээтчити булар сорук турар. Бүгүҥҥү күҥҥэ улуус дьаһалтата ОДьКХ министиэристибэтин салалтатын кытта олохтоох бүддьүөттэн эбии төлөбүрдээх субсидия ылар туһунан сөбүлэҥ баттаспыта. Маны таһынан, Үчүгэй орто оскуолатын тутуутун быйыл түмүктүүргэ туһуламмыт боппуруостары туруорустубут.   Бу уонна да атын суолталаах боппуруостары миниистирдэр кэбиниэттэрин иннигэр туруордум. Мунньах кыттыылаахтара туһааннаах боппуруостарга санааларын атастастылар. Суолталаах тэрээһин сүнньүнэн СӨ Бырабыыталыстыбатын боротокуола оҥоһуллан үлэҕэ киириэҕэ, — диэн бэлиэтээтэ улуус баһылыга Александр Оконешников.

… Бу суолталаах мунньах быйыл Өймөкөөн улууһугар ыытыллыбыт ситэриилээх былаас отчуотун боппуруостарын быһаарыыга туһуланна. Онон бырабыыталыстыба отчуота олус көдьүүстээх тэрээһин буолар. Ситэриилээх былаас бөлөҕүн Өймөкөөн улууһугар СӨ тырааныспарга уонна суол хаһаайыстыбатыгар миниистирэ Владимир Сивцев салайан илдьэ сылдьыбыта. Тымныы полюһун олохтоохторо иккис сылын бырабыыталыстыба отчуотугар субуруччу сылдьар миниистир олоҕу-дьаһаҕы кытта ыкса билсэн, көдьүүстээх үлэни ыытарын бэлиэтииллэр. Өссө да үгүс суолталаах боппуруостарга болҕомтотун туһаайан, миниистир ситэриилээх былаас отчуотун бөлөҕүн салайбыт киһи быһыытынан үгүс боппуруос кэмигэр быһаарыллыытыгар үлэлэһиэҕэ диэн эрэнэллэр.