«Колымские новости» хаһыат архыыбыттан хаартыска
Бүгүн, олунньу 3 күнүгэр, Үөһээ Халыма улууһугар бырабыыталыстыба отчуота саҕаланна. Оробуочай бөлөҕү Саха Өрөспүүбүлүкэтин Сыана бэлиитикэтигэр судаарыстыбаннай кэмитиэтин бэрэссэдээтэлэ, улуус куратора-координатора Николай Бочков салайар.
Үөһээ Халыма улууһугар сылдьан ыытыллар тэрээһиннэр бырагыраамалара улуус киинин Зырянканы, ону таһынан Угольнай, Нелемнэй, Үөһээ Халыма, Уһун Күөл уонна Утайа сэлиэнньэлэрин хабыаҕа. Көрсүһүүлэр чэрчитинэн олохтоохтору долгутар социальнай-экэнэмиичэскэй сайыннарыы, социальнай өйөбүл миэрэлэрин уонна инфраструктура тутуутун боппуруостарыгар хоруйдар бэриллиэхтэрэ.
Олохтоохтор тус ыйытыыларынан былаан оҥоһуллуоҕа диэн СӨ Сыанаҕа судаарыстыбаннай кэмитиэтигэр бэлиэтээтилэр. Эрэгийиэн биэдэмистибэлэрин салайааччылара муниципальнай тэриллиилэр олохтоохторун кытта көрсүһүөхтэрэ. Нэһилиэнньэни кытта кэпсэтиини үп-харчы, экэниэмикэ, тыа хаһаайыстыбатын, доруобуйа харыстабылын, үөрэх уонна билим, үлэ уонна социальнай сайдыы, Арктика сайдыытыгар уонна Хотугу норуоттар дьыалаларыгар министиэристибэлэрин салайааччылара, ону таһынан Сири нүөлсүтүү уонна тыа хаһаайыстыбатын уунан хааччыйыы управлениета, ОДьКХ сайдыытыгар уонна энэргиэтикэни сэргэхситиигэ киин, «АрктикТелеком» хампаанньа, уонна Дьиэ тутуутун дирекциятын бэрэстэбиитэллэрэ ыытыахтара.
Санатан эттэххэ, Бырабыыталыстыба оробуочай бөлөхтөрө өрөспүүбүлүкэ бары муниципальнай тэриллиилэригэр сылдьан ыытар отчуоттара кулун тутар саҕаланыытыгар Дьокуускайга түмүктэниэхтэрэ. Түмүк отчуоту «Саха» НКиХ теле- уонна араадьыйа ханаалларынан таһаарыллыахтара.
СӨ Ил Дархана Айсен Николаев эрдэ бэлиэтээбитинэн, отчуоту ыытыы былааһы уонна олохтоохтору кытта ыкса сибээстээх сыһыаны олохтуурга наадалаах уонна туһалаах. Кини этэринэн, өрөспүүбүлүкэ үгүс олохтооҕо былаас бэрэстэбиитэллэрин кытта тыыннаах кэпсэтиини ордорор — олохтоохторго нэһилиэнньэлээх пууннарын сайдыытын чуолкай олохтоох боппуруостарын дьүүллэһэргэ кыах биэрэр.
Үгэс быһыытынан, отчуот кэмигэр өрөспүүбүлүкэ Бырабыыталыстыбатын чилиэннэрэ нэһилиэнньэни кытта көрсүһүүлэргэ сыл устата ыытыллыбыт үлэ туһунан иһитиннэрэллэр, сэлиэнньэлэр уонна нэһилиэктэр сайдыыларын боппуруостарыгар сиһилии хоруйдууллар, социальнай эйгэ эбийиэктэригэр сылдьаллар, гражданнар тус боппуруостарынан дьүүллэһиини тэрийэллэр. Интэриниэккэ бу аадырыһынан Саха Өрөспүүбүлүкэтин Бырабыыталыстыбатын 2025 сыллааҕы отчуотун официальнай саайта үлэтин саҕалаата: https://otchet2025.sakha.gov.ru.
РФ Бэрэсидьиэнэ Владимир Путин эрдэ бэлиэтээбитинэн, судаарыстыбаннай былаас уорганнарын аһаҕас, олохтоохтору кытта сибээс судаарыстыба үлэтин көдьүүһүн биллэрдик үрдэтэр.
Кулун тутар ыйыгар киинэ тыйаатырдарыгар «Олох түгэннэрэ» киинэ тахсыаҕа. Бу киинэ биллэр сериал түмүктүүр чааһа…
Тохсунньу ыйга өрөспүүбүлүкэ дьарыктаах буолуу кииннэрин нөҥүө байыаннай дьайыы 10 кыттыылааҕа уонна кинилэр дьиэ кэргэттэрин…
«Ты в игре» Бүтүн Арассыыйатааҕы успуорт бырайыактарын куонкуруһун VI-с сезона саҕаламмытын туһунан успуорт миниистирэ, Арассыыйатааҕы…
Тохсунньу 30 күнүгэр Дьокуускай куорат Сир сыһыаннаһыыларын ааҕыныстыбатыгар байыаннай дьайыы кыттыылаахтарыгар сир учаастактарын түҥэтии буолан…
Үрдүк категориялаах фтизиатр-быраас, мэдиссиинэ билимин дуоктара, суруйааччылар холбоһуктарын чилиэнэ Валериан Парфеньевич Николаев 1951 сыллаахха олунньу…
Саха сиригэр олунньу ый нуорматтан сылаас буолуо диэн сабаҕаланар, ол гынан ый бастакы аҥаарыгар сорох…