Бырайыактар төрөөбүт тылы туһаныы эйгэтин өссө кэҥэтэргэ туһалыахтара

Төрөөбүт тыл уонна  сахалыы  сурук-бичик күнүн чэрчитинэн,  “Судаарыстыбаннай уонна дьиҥ таһымнаах тыллары харыстааһын уонна сайыннарыы” («Сохранение и развитие государственных и официальных языков в Республике Саха (Якутия)» диэн  Саха Өрөспүүбүлүкэтин судаарыстыбаннай бырагырааматын чэрчитинэн олоххо киллэриллибит бырайыактар түмүктэрин билиһиннэрдилэр.

Бу бырагыраама Саха Өрөспүүбүлүкэтин норуоттарын тылларын  харыстааһыҥҥа уонна салгыы сайыннарыыга сүрүн оруоллаах, ону сэргэ култуура нэһилиэстибэтэ бигэ туруктаах буоларыгар көмөлөһөр.

Бу күн министиэристибэлэр бэрэстэбиитэллэрэ, учуонайдар, учууталлар уонна уопсастыбаннай диэйэтэллэр  бырайыактарын билиһиннэрдилэр.

Сүрүн иһитиннэриини оҥорбут СӨ култуураҕа уонна духуобунай сайдыыга миниистирэ Афанасий Ноев:  «Биһиги өрөспүүбүлүкэбит судаарыстыбаннай уонна дьиҥ таһымнаах тылларын харыстыыр хайысхалаах тэрээһиннэри ыытабыт. Бу үлэҕэ судаарыстыба структуралара эрэ буолбакка, наука уопсастыбата, учууталлар, суруналыыстар уонна уопсастыбаннай диэйэтэллэр кытталлара олус суолталаах. Ол тыл нэһилиэстибэтин харыстабылыгар тиһиктээх көрүү, сыһыан баарын бигэргэтэр”, — диэтэ.

Элбэх бырайыак  Хотугу сир, Сибиир уонна Уһук Илин аҕыйах ахсааннаах төрүт норуоттара олорор сирдэригэр эспэдииссийэлэри тэрийиигэ анаммыт. Ол түмүгэр, элбэхтэн биири аҕыннахха, ХИФУ учуонайдара дьүкээгирдии уонна чукчалыы урут ханна да ахтыллыбатах дьикти тыллары булбуттар. Маннык сэдэх  матырыйааллар өс хоһооннор уонна таабырыннар курдук мультимедийнай бырайыактары оҥорорго көмөлөһүөхтэрэ.

Дакылаатчыттар төрөөбүт тыллары   подкастар, этномуусукалаах тректэр уо.д.а. сыыппаралаах технологиялар  көмөлөрүнэн аныгы сыыппаралаах эйгэҕэ киллэрии билигин биир дьоһун суолталаах сорук буоларын бэлиэтээтилэр.

Бырайыактар ортолоругар Национальнай бибилэтиэкэ СӨ норуоттарын тылларын харыстабылыгар бырайыага (дакылаатчыт Василий Борисов), «Издание и поставка дневника для первоклассников» (Айталина Крылова),  “Тойтой Боотур” анимационнай бырайыак (салайааччы Дарья Ермолаева),  «Производство мультимедийного контента на родном языке в школьных медиацентрах «Кэскил» (дакылаатчыт Н.Е.Мординов-Амма Аччыгыйа аатынан “Кэскил” оҕо издательствотын судаарыстыбаннай автономнай тэрилтэлтин дириэктэрэ Ольга Семенова) уо.д.а. бааллар.

 Бырайыактары билиһиннэрии кэнниттэн Афанасий Ноев саха тылын харыстабылыгар биллэр кылааттарын киллэрбит дьоҥҥо наҕараадалары: министиэристибэ Бочуоттаах бэлиэлэрин уонна Махтал суруктарын туттарда.

Бырайыактары билиһиннэрии билиҥҥи балаһыанньаны сыаналыырга эрэ буолбакка, тыл бэлиитикэтигэр саҥа көрүүлэри киллэрэргэ, төрөөбүт тылы туһаныы эйгэтин өссө кэҥэтэргэ туһалыахтара.