Бырайыактарын олоххо киллэрбиттэр чиэстэннилэр

Бэҕэһээ, сэтинньи 28 күнүгэр, Ил Дархан гранын кыайан, биэс бастыҥ бырайыагы олоххо киллэрбит дьону наҕараадалаатылар.

Өрөспүүбүлүкэ ыччат дьыалаларыгар уонна социальнай коммуникацияларга миниистирин солбуйааччы Андрей Сосновскай бастыҥ бырайыактары көҕүлүүр үгэс үс сыл буолбутун бэлиэтээтэ. Уопсайа, 2020 сылтан 2024 сылга диэри гражданскай уопсастыбаны сайыннарыыга СӨ Баһылыгын граннарын куонкуруһугар 1991 сайабылыанньа киирбит. 2024 сылга 31 улуустан 400 кэмиэрчэскэйэ  суох тэрилтэлэртэн 474 көҕүлээһин биллэриллибит. Ордук көхтөөх улуустарынан Ньурба (38), Горнай (29), Сунтаар (25), Чурапчы (24), Амма (23), Мэҥэ Хаҥалас (22) ааттаннылар.

Кэмиэрчэскэйэ суох тэрилтэлэр ортолоругар саамай тарҕаммыт грант хайысхалара: култуура, искусство, биирдиилээн киһи духуобунай сайдыытын көҕүлээһин (77 сайабылыанньа), патриотическай иитии (69), доруобуйа харыстабыла, чөл олох уонна успуорт (61), ыччат бэлиитикэтэ (49).

Биэс бастыҥ бырайыак иһигэр киирдилэр: Горнай улууһун Бэрдьигэстээх сэлиэнньэтин “Сардаҥа” территориальнай уопсастыбаннай бэйэни салайыныы тэрилтэтин “Доруобуйа марафона” (салайааччы Любовь Мордовская), Ыччат култуурунай киинин уонна инбэлииттэр “Ой дуораана” түмсүүлэрэ (салайааччы Павел Яковлев), “Солнце Якутии” Даун синдромнаах оҕолор төрөппүттэрин сойууһа, “Теннис без границ” (салайааччы Анисия Яковлева), Нерюнгри оройуонун «Волонтердар» түмсүүлэрин “Үтүөнү оҥоробун” бырайыага (“Несу добро”, салайааччы Алексей Наумов), Горнай улууһун Бэрдьигэстээх сэлиэнньэтин «Ыччат кэскилин былаһаакката” бырайыак (салайааччы Наталья Никитина) .