Бырайыактарынан Арассыыйаҕа бастыҥнар кэккэлэригэр

Бу күннэргэ Арассыыйа Бэрэсидьиэнин 2025 сыллааҕы иккис гранын пуондатын кыайыылаахтара билиннилэр.

Саха сириттэн 157 сайаапка киирбититтэн түмүккэ 17 кыайыылаах талыллыбыт. Олор ортолоругар Горнай улууһун 3 барыла киирэн үөрүүбүт улаатта.

Ол курдук, Кировскай орто оскуолатын «Туйгун» кэммиэрчэскэйэ суох автономнай тэрилтэ “Верность традициям – основа будущего» бырайыагынан 1 091 081,43 солкуобайы ыларга тигистэ.

Барыл ааптара Илья Алексеев маннык этэр: «Бу бырайыакпыт оскуолабыт үөрэнээччилэрин патриотическай иитиигэ уонна үлэ үөрүйэхтэрин сайыннарыыга туһуланар. Сүрүн суолтата көлүөнэлэр икки ардыларыгар сибээһи, ситими бөҕөргөтүү, историческай нэһилиэстибэҕэ убаастабылы уонна үлэ нөҥүө эдэр ыччаты иитии-үөрэтии буолар. Бырайыакпыт чэрчитинэн 8 тэрээһини тэрийиэхпит. Уонна “Оҕо ыһыаҕа” диэн сайыҥҥы бырааһынньыгынан түмүктүөхпүт».

Иккис кыайыылааҕынан Солоҕон нэһилиэгин «Самородок» кэммиэрчэскэйэ суох автономнай тэрилтэ буолар. «Летний лагерь для пожилых пионеров “Мы из СССР”” диэн бырайыага 1 196 434,60 солкуобайынан үбүлэннэ.

—  Биһиги СССР-тан төрүттээхпит саастаах пионердарга аналлаах сайыҥҥы лааҕыр бырайыак быһыытынан Тимофеевтар ретро-музейдарыгар 2021 сыллаахха үөскээбитэ. Ол, музейы саҥалыы көрүүлээн, сайыннаран үлэлэтэр сыаллаах толкуйдаабыппыт. «Летний лагерь для пожилых пионеров «Мы из СССР» диэн ааттанан Өрт оскуолатын интернатын баазатыгар 10 хонукка 20 кырдьаҕаска лааҕыры үлэлэтэн ситиһиилээхтик түмүктээбиппит. Ити бырайыакпыт быйыл РФ Бэрэсидьиэнин гранын ылары ситистэ. Быйыл сайын эмиэ лааҕырбыт үлэтин сөргүтээри бэлэмнэнэ сылдьабыт, — диэн бырайыак ааптара Мария Юрьевна Павлова кэпсиир.

Үһүс кыайыылааҕынан Светлана Лю-Фа салайааччылаах Бэрдьигэстээх нэһилиэгин «Үрдэл» ТОС буолар. «Хочу быть сильным, ловким и выносливым” бырайыак уопсай суумата 1 414 362,40 солкуобайга тэҥнэһэр.

—  Биһиги түөлбэбитигэр спортивнай былаһаакка баар, онно оҕолор куруук дьарыктаналлар уонна спортивнай күрэхтэһиилэр, бырааһынньыктар ыытыллаллар. Бырайыакпыт 7 сааһыттан үөһэ саастаах оҕолордоох дьиэ кэргэҥҥэ ананар. Сүрүн уратытынан дьиэ кэргэнинэн оҕолорун кытта сибиэһэй салгыҥҥа бииргэ эт-хаан өттүнэн сайдыы, чөл олоҕу уонна туруктаах буолууну, бигэ тирэҕи үөскэтии буолар, — диир бырайыак ааптара Светлана Лю-Фа.

Маннык барыллар чахчы нэһилиэнньэҕэ көмөлөөх, дьоҥҥо наадалаах уонна күүс-көмө, өйөбүл буолуохтара диэн эрэнэбит. Биир дойдулаахтарбытын кыайыыларынан эҕэрдэлиибит!

Саргылана Петрова,

Горнайдааҕы кииннэммит библиотечнай ситим бырайыактыыр киинин исписэлииһэ.

Хаартыскалар Саргылана Петрова тиксэриилэрэ