Бырамыысыланнай тэрилтэлэр Өймөкөөҥҥө көмөлөһүөхтэрэ

Ил Дархан  Айсен Николаев Өймөкөөҥҥө бара сылдьан, Уус-Ньараҕа көмүһү хостуур бырамыысыланньыктары кытта көрүстэ. Мунньахха халаантан эмсэҕэлээбит Өймөкөөн улууһун олохтоохторугар көмөнү оҥоруу туһунан кэпсэттилэр. Мунньахха муниципальнай тэриллии сиригэр-уотугар үлэлиир көмүс хостуур тэрилтэлэр салайааччылара уонна бэрэстэбиитэллэрэ кыттыыны ыллылар.

Улуус баһылыга бүгүн улуус олохтоохторо улахан тургутуулары ааһалларын бэлиэтээтэ. Күүстээх ардах кэнниттэн сорох нэһилиэктэр ууга барбыттара. 1200 кэриҥэ киһи эмсэҕэлээбит, элбэх дьиэ-уот, суол-иис алдьаммыт, сорох дьон дьиэтэ-уота суох хаалбыт.

“Биһиги сүрүн баайбыт – дьон. Эһиги кыаххыт кыра да чааһа кинилэри быыһыан сөп. Сыл аайы 10 туонна күндү металл хостонор, бу салаа бүддьүөккэ улахан нолуок дохуотун биэрэр. Бу сыыппара эрэ буолбатах – бу биһиги уопсай кыахпыт, күүспүт. Саха сирин бырамыысыланнаһа сир баайын хостуур эрэ буолбакка, социальнай эппиэтинэстээх, киһилии сиэрдээх-майгылаах буоларын көрдөрүөххэйиҥ”, — диэн Айсен Николаев эттэ.

Онуоха көмүһү хостуур тэрилтэлэри бэрэстэбиитэллэрэ өрөспүүбүлүкэ баһылыгын ыҥырыытын өйөөтүлэр.

«Туспа-туора алдьархай диэн суох. Эмсэҕэлээбит дьоҥҥо көмөлөһөргө бэлэммит. Биир идэлээхтэрбит эмиэ туора туруохтара суоҕа. Ыарахан балаһыанньаттан тахсарга өрүү бииргэ үлэлээбиппит, бу сырыыга эмиэ оннук үлэлиэхпит», — диир биир тэрилтэ генеральнай дириэктэрин солбуйааччы Владимир Никонов.

Мунньахха дьиэлэрин сүтэрбит гражданнарга көмөлөһөргө үп-харчы көрүллүүтэ, суһаллык чөлүгэр түһэрии үлэтигэр  кыттарга тиэхиньикэни уонна исписэлиистэри ыытыы туһунан кэпсэттилэр. Халаантан эмсэҕэлээбит хас биирдии нэһилиэнньэлээх пууҥҥа биирдии бырамыысыланнай тэрилтэлэр ананыахтара диэн быһаарыы ылылынна.

Мунньахха өрөспүүбүлүкэ бырамыысыланнаска  уонна геологияҕа миниистирин бастакы солбуйааччы Михаил Кириллин уонна Өймөкөөн оройуонун баһылыга Александр Оконешников тыл эттилэр. Сиһилии манна аах.