Бырамыысыланнас салаатыгар үлэни хайдах булуохха?

АЛРОСА-ҕа каадырдар сүрүн боппуруоһунан буолаллар. Хампаанньаҕа хамнас тиһигин быспакка индексацияланар уонна социальнай мэктиэ систиэмэтэ үлэлиир. Алмааһы хостооччулар усулуобуйалара, арааһа, өрөспүүбүлүкэҕэ саамай бастыҥнара буолуо. Успуорт уонна тренажер саалалара, айар үлэҕэ саҕалааһыны өйөөһүн, үлэһиттэри үөрэтии уонна идэлэрин үрдэтии, санаторийдарга сынньалаҥ, мэдиссиинэ өҥөтүнэн хааччыйыы уо.д.а. – барыта хампаанньа суотугар.

Үлэни эрэ буолбакка, бэйэ аналын булуу

Ааспыт нэдиэлэҕэ “Работа России. Время возможностей” үлэни булууга Бүтүн Арассыыйатааҕы дьаарбаҥка эрэгийиэннээҕи түһүмэҕин чэрчитинэн, АЛРОСА уонна “Анаабыр алмаастара” баар бакаансыйалары билиһиннэрдилэр.

«Биһиги дьаарбаҥкаҕа подразделениеларбытыгар уонна дочернай тэрилтэлэрбитигэр баар олус наадалаах бакаансыйалары билиһиннэрдибит. Мииринэйдээҕи-Ньурбатааҕы хайа-байытар кэмбинээт, АЛРОСА-Торг, Массыына суолларын Мииринэйдээҕи управлениета (МУАД) курдук тэрилтэлэри бастайааннай уонна баахта үлэтин быһыытынан көрдөрдүбүт.
Дьаарбаҥка кыттыылаахтара биһиги этиилэрбитин кытары билсэр кыахтаннылар, ону сэргэ сүбэ-ама ыллылар. Барыта 100-тэн тахса киһи үлэни сэргээбититтэн 10 киһини салгыы кэпсэтиигэ ыҥырдыбыт, атын да сайаапкалары үөрэтиэхпит”, — диэн АЛРОСА үлэһиттэри сүүмэрдээһиҥҥэ сүрүн исписэлиис Наталия Герасимова кэпсээтэ.

Амелия Саввинова, Дьокуускай к.:
— Мин бриллианы сыаналыыр уонна наардыыр идэ бакаансыйатыгар резюмеьын биэрдим. Мин Саха судаарыстыбаннай университетыгар геологическай-чинчийии факультетын бүтэрбитим, кэлин бриллианы сыаналыырга уонна суортааччы эспиэргэ үөрэммитим. Чааһынай хампаанньаҕа үлэлээбитим, уопсайа 8 сыл ыстаастаахпын. АЛРОСА – бу эйгэҕэ саамай биллэр хампаанньа, кыаллар буоллаҕына, алмааһынан эргинэр тэрилтэҕэ (ЯПТА) үлэлиэхпин баҕарабын.

Николас Никифоров, Горнай улууһа:
-Мин Горнай улууһун Маҕарас сэлиэнньэтиттэн сылдьабын, 2014 сылтан “Анаабыр алмаастара” тэрилтэҕэ баахта ньыматынан суортааччынан уонна 4-с разрядтаах сепараторщигынан үлэлиибин. Бас тэрилтэҕэ киириэхпин баҕарабын. Мин баахта ньыматынан үлэлииргэ үөрэнним, онон ханнык баҕарар учаастакка үлэлииргэ бэлэммин эбэтэр бастайааннай үлэҕэ киириэхпин сөп. АЛРОСА сөптөөх хамнастааҕынан уонна үлэлииргэ үчүгэй усулуобуйалааҕынан бэйэтин биллэрбит хампаанньа.
АЛРОСА сүрүн орто анал уонна үрдүк үөрэх кыһаларын кытары биир ситимнээхтик үлэлиир, бииргэ үлэлиир туһунан дуогабар түһэрсэр. Алмааһы хостуур хампаанньа бииргэ үлэлэһээччилэриттэн биирдэстэринэн М.К.Аммосов аатынан ХИФУ буолар. Кэнники сылларга хампаанньа тэрилтэлэригэр университеты бүтэрбит 100-тэн тахса ыччат үлэҕэ киирдэ. АЛРОСА структурнай подразделениелара сыл аайы ХИФУ 150-тан тахса устудьуонун үлэ быраактыкатыгар ылаллар.
“2025 сыллаахха дьаарбаҥкаҕа ураты болҕомто ыччакка үлэни сирдииргэ ууруллубута – устудьуоннар, үөрэҕи бүтэрбиттэр уонна кинилэр төрөппүттэрэ саамай наадалаах үлэлэр уонна үлэ ырыынагар актыыбынай треннэр тустарынан билэр кыахтаммыттара. Ол түмүгэр, биһиэхэ олус элбэх ыччат АЛРОСА-ҕа быраактыканы барыыны, үөрэҕи бүтэрээччилэргэ төһө бакаансыйа баарын интэриэһиргээбиттэрэ”, — диэн Наталия Герасимова бэлиэтээн эттэ.

Саха сиригэр үлэни биэрэр улахан тэрилтэ

АЛРОСА тэрилтэлэригэр 35 тыһыынчаттан тахса киһи үлэлиир, 80-тан тахса бырыһыана – өрөспүүбүлүкэ сиригэр-уотугар. Саҥа үлэһиттэр кэлэктиипкэ, үлэҕэ үөрэниилэрин (адаптация) систиэмэтэ уонна эдэр исписэлиистэргэ настаабынньыктар бырагыраамалара бааллар. Хампаанньа бэйэтин корпоративнай университетын базатыгар үлэһиттэрин үөрэтиинэн уонна сайыннарыынан тиһигин быспакка дьарыктанар. Ол идэни баһылыылларыгар уонна үрдүүллэригэр көмөлөһөр.

АЛРОСА уонна СӨ дьарыктаах буолууга судаарыстыбаннай кэмитиэтэ 2018 сылтан “Олохтоох каадырдары – бырамыысыланнаска” бырайыагы олоххо киллэрии чэрчитинэн бииргэ үлэлээбиттэрэ. Бырайыак Саха сирин олохтоохторун үлэҕэ ылыы кыһалҕатын быһаарар соруктаах 2017 сылтан саҕаламмыта уонна 2024 сыллаахха түмүктэммитэ.

Бу кэмҥэ АЛРОСА ““Олохтоох каадырдары – бырамыысыланнаска” бырайыак бастыҥ кыттааччыта» сыл аайы ыытыллар куонкурус кыайыылааҕынан хаста да буолбута. АЛРОСА хампаанньаларын бөлөҕө Саха сирин олохтоохторун үлэҕэ ылыыга куруук инники иһэр. Сэттэ сыл иһигэр АЛРОСА тэрилтэлэригэр өрөспүүбүлүкэ 22 тыһыынчаттан тахса олохтооҕо – бырагырааманан үлэҕэ ылыллыбыт дьон уопсай ахсааныттан үс гыммыттан биирэ кэриэтэ (29%) үлэлэннэ. Аҥаардас былырыын 6,5 тыһыынчаттан тахса киһи хампаанньаҕа үлэҕэ киирдэ. “Олохтоох каадырдары – бырамыысыланнаска” бырайыак түмүктэммитин кэнниттэн үрдүк таһымнаах каадырдары бэлэмнииргэ уонна үлэҕэ тардарга “Үлэлиир Саха сирэ. Каадырдар” киэҥ хабааннаах бырайыак үлэтин саҕалаата.

«АЛРОСА, биллэн турар, бу саҥа бырагыраамаҕа көхтөөхтүк кыттыаҕа. Онуоха биһиги Саха сирин олохтоохторо ханнык эрэ бырагырааманы кытта сибээстээхтэрин иһин буолбакка, биһиги төрөөбүт эрэгийиэммит буоларын иһин үлэҕэ ыҥырабыт. Саха сирин олохтоохторо бэйэлэрин дойдуларыгар үлэлииллэрин ордороллор, онуоха бары уопсай соруктаахпыт – АЛРОСА үлэтэ өрөспүүбүлүкэ сайдыытыгар көмөлөһөрүгэр” – диэтэ АЛРОСА генеральнай дириэктэрэ Павел Маринычев.

АЛРОСА саҥа бырайыакка көхтөөхтүк кыттыһар. Хаһаайыстыбаннай актыып пуорумугар АЛРОСА хампаанньа, СӨ Бырамыысыланнаска уонна геологияҕа министиэристибэтэ уонна СӨ дьарыктаах буолууга судаарыстыбаннай кэмитиэтэ “Үлэлиир Саха сирэ. Каадырдар” бырайыагы олоххо киллэриигэ хардарыта бииргэ үлэлиир туһунан үс өрүттээх сөбүлэһиигэ илии баттаатылар.
“Үлэлиир Саха сирэ. Каадырдар” бырайыак уратытынан хас биирдии үлэни биэрээччигэ – бырайыак кыттыылааҕар тус-туспа сыһыан болҕомто буолар. Хампаанньаҕа каадырдарга консультант ананыаҕа. Биһиги АЛРОСА-ны кытары салгыы бииргэ үлэлээһиммит өрөспүүбүлүкэ салгыы сайдарыгар уонна Саха сирин дьоно нус-хас олохтоноллоругар өссө элбэх саҥа кыахтары арыйыаҕа”, — диэн СӨ нэһилиэнньэ дьарыктаах буолуутугар судаарыстыбаннай кэмитиэт бэрэссэдээтэлэ Светлана Горюшинская кэпсээтэ.

«Билигин бырамыысыланнас тэрилтэлэригэр 100 тыһыынчаттан тахса киһи үлэлиир. АЛРОСА саҥа бырайыакка кыттыыта Саха сирин олохтоохторо үлэни булалларыгар эрэ буолбакка, алмааһы хостуур салааҕа элбэх кыаҕы уонна кэскили биэрэр, үлэни булалларыгар көмөлөһөр.
— диэн Максим Терещенко бэлиэтээн эттэ.

«Үлэлиир Саха сирэ. Каадырдар» бырайыак быһыытынан саҥа бакаансыйалар, стажировкалар, тэрилтэлэри кытары аадырыстаммыт үлэлэр баар буолуохтара. Быйыл олохтоох нэһилиэнньэттэн 3 тыһыынча исписэлииһи үлэҕэ тардыы былааннанар. Бу барыта хас биирдии киһи дууһата сөбүлүүр үлэтин буларыгар, үөрэнэригэр уонна чопчу Саха сиригэр бэйэтин көрдөрөрүгэр туһуланар», — диэн Ил Дархан Айсен Николаев эрдэ эппитэ.

Ону сэргэ бырайыакка нэһилиэнньэ дьарыктаах буоларыгар көмөлөһүүгэ түмүктээхтэрин уонна көдьүүстээхтэрин көрдөрбүт тэрээһиннэр киириэхтэрэ. Холобур АЛРОСА хас да сыллааҕы бырайыактара: “АЛРОСА-кылаас” бырайыак, өрөспүүбүлүкэ үөрэҕин кыһаларын кытары бииргэ үлэлээһин, настаабынньыктааһын, үөрэх, идэни үрдэтии уонна уларытыы бырагыраамалара, үлэһиттэр ситиһиилэрин бэлиэтээһин уонна үлэҕэ үрдээһин уо.д.а.

Быһаарыы: АЛРОСА – 2024 сылга “Олохтоох каадырдары – бырамыысылыннаска” бырайыак бастыҥ кыттааччыта” куонкурус кыайыылааҕа.

Андрей ШИЛОВ суруйуутуттан тылбаас
 Андрей Сорокин, Андрей Шилов хаартыскалара