Бүрээт тыйаатыра үс күннээх гостуруолга кэллэ

Хоца Намсараев аатынан Бүрээт норуотун академическай тыйаатыра Саха тыйаатырыгар улахан гостуруолга кэллэ. Үс күн устата Бурятияттан кэлбит артыыстар үс испэктээги көрдөрүөхтэрэ.

Бүгүн, алтынньы 9 күнүгэр, “Көтүү. Билчиргэ буолбут түгэн” диэн ааттаах испэктээк гостуруол маҥнайгы күнүн арыйыаҕа. Туруорааччы-режиссер Сойжин Жамбалова былырыын национальнай тыйаатырдар кэнгириэстэригэр кэлэн кыттыыны ылбыта. Роман Дорофеевы кытта биир сыанаҕа тыйаатыр питчинигэр туруоруутун көрдөрбүтэ. “Билчиргэ буолбут түгэн” Валентин Распутин “Прощание с Матёрой» сэһэнигэр олоҕуран суруллубут дыраама.  Братскай ГЭС тутуутугар ууга барбыт бөһүөлэк трагедиятын кэпсиир. Туруоруу олус уустук декорациялаах.
Алтынньы 10 күнүгэр режиссер Олег Юмов “Үхэжэ ядашаһан король” туруоруута көстүөҕэ. Режиссер этэринэн, Эжен Ионеско “Король умирает” пьесатын буддизм өттүттэн толкуйдаан көрүү буолар.

Түмүктүүр испэктээги тыйаатыр салайааччыта Саян Жамбалов туруорар. “Үнгэрһэн сагай һэбшээн” диэн ааттаах туруоруу бырагырааматыгар “ааспыт кэмнэр тыаллара, ырыа-испэктээк” диэн хоһуллубут. Үрүҥ былаас генерала Уржин Гармаев уобараһынан ол дьалҕааннаах кэм туһунан кэпсиэхтэрэ.
Саха тыйаатырын “Таас саалатыгар” ыытыллыбыт пресс-кэмпириэнсийэҕэ Саян Жамбалов уонна Арассыыйа норуодунай артыыската Лариса Егорова кыттыыны ыллылар.
Саян Жамбалов: “Сарсыарда саппаҕырбыт күҥҥэ турдум дии санаабытым, күн тахсан чаҕылыҥнаата. Бу үс күн Саха тыйаатырыгар күн уотун саҕыахпыт диэн эрэнэ саныыбын!”,- диэн киирии тылынан саҕалаата.

Барыта холбоон Бүрээт тыйаатырыттан барыта 54 киһи кэлбит. Артыыстары таһынан тыйаатыр сыанатын таҥааччы үлэһиттэр кэлбиттэр. “Сорох туруоруулар бэрт уустук декорациялаахтар. Холобур, “Билчиргэ буолбут түгэн” туруоруутугар сыанаҕа 5 туонна ууну кутабыт. Бу усулуобуйаны толорор кыахтара суох буолан, Монголияҕа испэктээги туруорууттан аккаастаммыттара. Саха тыйаатыра олус үчүгэй сыаналаах, онон бу туруорууну хайдах санаммытынан көрдөрөр кыахтаахпыт”, — диэн кэпсээтэ.
Лариса Ильинична: “Саха сиригэр бу үһүс кэлиим, бастакыбын Ийэ күнүн бырааһынньыгын олохтуур тэрээһиҥҥэ, бастакы бэрэсидьиэҥҥит Михаил Николаев ыҥырыытынан кэлэ сылдьыбытым”, — диэн кэпсээтэ.