Дьокуускай куорат олохтоохторугар Бырабыыталыстыба отчуота буолла

Бэҕэһээ, кулун тутар 6 күнүгэр, ситэриилээх былаас отчуота Дьокуускай куоракка буолан ааста.

Ол курдук, Можайскай аатынан уулуссаҕа баар Юрий Гагарин аатын сүгэр култуура киинигэр дьон-сэргэ муһунна. Оробуочай бөлөҕү СӨ Бырабыыталыстыбатын бэрэссэдээтэлэ Кирилл Бычков салайда. Тэрээһин чэрчитинэн отчуот саҕаланыан иннинэ «1941-1945 cc. Аҕа дойду Улуу сэриитигэр Кыайыы 80 сыла» мэтээллэри  туттарыынан саҕаланна.  Аҕа дойду Улуу сэриитин икки бэтэрээнигэр  — Галина Андреевнаҕа уонна Галина Петроваҕа Кыайыы мэтээллэрин туттардылар, маны  сэргэ уопсастыбаннай олоххо көхтөөх үлэ-хамнас иһин махтал суруктары туттартаатылар. Тэрээһиҥҥэ СӨ Бырабыыталыстыбатын чилиэннэрэ кыттыннылар. Ону сэргэ Дьокуускай баһылыга Евгений Григорьев, куорат Дууматын дьокутааттара, куорат уопсастыбаннаһа.

«Бу сылга уопсайа 33 отчуоту ыыттыбыт. Ону таһынан куорат таһыгар сытар бөһүөлэктэргэ СӨ Бырабыыталыстыбатын бэрэстэбиитэллэрэ отчуоттары ыыттылар. Дьокуускай куоракка нэһилиэнньэни көрсөн отчуот ыытар улахан суолталаах дии саныыбын. Дьон бэйэтин күннээҕи кыһалҕатын, баҕа санаатын тириэрдэрэ  биһиэхэ үлэбитигэр сүрдээҕин туһалыыр. Быйыл Улуу Кыайыы 80 сылын көрсө куораппыт бэлэмнэнии үлэтин саҕалаата, култуурунай-маассабай тэрээһиннэри ыыттыбыт. Саамай улахан тэрээһин ыам ыйын 9 күнүгэр буолуоҕа», — диэн киин куорат баһылыга Евгений Григорьев санаатын үллэһиннэ.

Дьокуускай куорат олохтоохторун сүрүннээн хаарбах дьиэттэн көһөрүү, Юрий Гагарин аатынан искибиэри тупсарыы, муусука кэллиэһигэр өрөмүөн, Хатаска баһаарынай чааһы тутуу, уу лотуоктара о.д.а буоллулар.

Дьокуускай куорат олохтооҕо Анастасия Гаврильевна Марк Жирков аатын сүгэр Дьокуускайдааҕы муусука кэллиэһин төрөппүттэрин аатыттан ыйытыыта өрөмүөн тула буолла. Кэллиэс дьиэтэ хас да сыл устата өрөмүөннэммэтэх, устудьуоннар куһаҕан усулуобуйаҕа үөрэнэллэрин иһитиннэрдэ.  Муусука Үрдүкү оскуолатын кытта кэллиэһи холбуохтара дуо диэн ыйытта. Ыйытыытын хамыыһыйа боротокуолугар киллэрэр туһунан этии көтөхтө. Кини ыйытыытыгар СӨ Култууратын уонна духуобунай  сайдыытын миниистирэ Афанасий Ноев хоруйдаата:

— Кэллиэс туһунан этэр буоллахха, уһун сыллар усталара хапытаалынай өрөмүөн ыытылла илик. Министиэристибэ үлэтин чэрчитинэн этэр буоллахха, бу сылга былааҥҥа турбат. Кэлэр сылга көрүөхпүт. Оттон муусука үрдүкү оскуолатын кытта кэллиэһи билигин холбуур туһунан боппуруос көрүллүбэт.  Ол эрээри, муусука үрдүкү оскуолатын тутан киллэрдэхпитинэ, бу боппуруоска эргиллэн кэлиэххэ сөп. Кэллиэс туругун, өрөмүөн ыытыллыахтааҕын туһунан бэйэбит билэбит.

Дьокуускай куорат Гагаринскай уокуругун бэрэстэбиитэлэ элбэх оҕолоох дьиэ кэргэттэр Сэбиэттэрин аатыттан ыйытыы киирдэ.  Ол курдук, Гагаринскай уокурукка 300 элбэх оҕолоох дьиэ кэргэн баарын эттэ. Гагаринскай уокурукка олус элбэх уопсастыбаннай сэбиэт үлэлиир. Бары олус көхтөөхтөр. Ол эрээри кинилэр үлэлиир, мустар дьиэлэрэ суоҕа атахтыыр эбит. Кинилэр мустар сирдэрэ суох буолан, култуура дьиэтигэр мусталлар эбит — уокурукка 5000 тыһ. оҕо олорор. Онон мустар сиргэ анаан Циолковскай аатынан уулусса 2-с №-дээх дьиэтин бастакы этээһин биһиэхэ биэриэххит дуо диэн ыйытта. Онуоха куорат баһылыга Евгений Григорьев  бу тутуу көҥүлэ суох тутуллубутун бэлиэтээтэ. Онон, бастатан туран, бу тутууну юридическай өттүнэн быһаарыахпытын наада диэтэ. Оҕолор сайдыыларыгар, биллэн турар, элбэх тутуулар наадалар диэтэ уонна инникитин бэтэрээннэргэ мусталларыгар  поликлиника аҥаарын  биэриэххэ сөбүн туһунан санаатын тиэртэ. Бу Гагаринскай уокурукка уопсастыбаннай түмсүүлэр сайдыыларыгар бастакы хардыы буолуоҕа диэтэ.