Бүтүн Арассыыйатааҕы байыаннай-тактическай «Путь воина» күрэхтэһии түмүктэннэ

Бүгүн Дьокуускайга историяҕа бастакы Бүтүн Арассыыйатааҕы байыаннай-тактическай «Путь воина» күрэхтэһии түмүктэннэ. Бу тэрээһин кыттааччыларга эрэ буолбакка, бүтүн дойдуга чаҕылхай түгэнинэн буолла.

Үөрүүлээх сабыллыы уонна кыайыылаах хамаандалары наҕараадалааһын саҥа үлэҕэ киирбит М.Е.Николаев аатынан 40 нүөмэрдээх оскуолаҕа буолан ааста. Тэрээһиҥҥэ Саха Өрөспүүбүлүкэтин Ил Дархана Айсен Николаев, тэрийэр кэмитиэт дириэктэрэ уонна собэрэссэдээтэлэ Дмитрий Шевченко уонна турнир судьуйата Дмитрий Кириенко тыл эттилэр.
Айсен Николаев кыттааччылары эҕэрдэлээтэ, кинилэр хорсуннарын-хоодуоттарын уонна кыайыыга дьулуурдарын бэлиэтээтэ. Кини бары финалистар дьиҥнээх дьоруойдар буолалларын, Ийэ дойдуларын көмүскүүргэ бэлэмнэрин бигэргэппиттэрин тоһоҕолоото.
«Эһиги Аҕа дойду Улуу сэриитин сылларыгар фашистары кыайбыт дьоруойдар дьиҥнээх сыдьааннара буоларгытын көрдөрдүгүт», — диэн кини ыччакка туһаайан эттэ.
Оттон Дмитрий Шевченко бу күрэхтэһиилэр дойду байыаннай-патриотическай иитиитин историятыгар киирбиттэрин бэлиэтээтэ. Кини тэрийээччилэргэ махтанна уонна Арассыыйа оборонатын күүһүн бөҕөргөтүүгэ көмөлөһөр «ВОИН» киин патриотическай иитиигэ бу дьоһуннаах хардыытын бэлиэтээтэ. Дмитрий Кириенко маннык уолаттары кытта Арассыыйа кэскилэ эрэллээх илиигэ баарын эбэн эттэ.
Финал кыттыбыт хамаандалар биир-биир сыанаҕа таҕыстылар, кинилэргэ өйдөбүнньүк бэлэхтэри уонна мэтээллэри туттардылар.
Күрэхтэһии кыайыылааҕынан Саха сирин «Боотур» хамаандата буолла.
Иккис миэстэ Тюмень уобалаһын «Соболь» хамаандата, үһүс миэстэ Хабаровскай кыраай «Амурские воины» уонна Волгоградскай уобалас «Сталинград» хамаандалара таҕыстылар.
Саха сирин хамаандата финал кыргыһыытыгар Тюмень уобалаһын хамаандатыныын кииристэ.
Бу кэрэхсэбиллээх киирсии 3 чаас 40 мүнүүтэ устата барда, уонна ыарахан усулуобуйаны аахсыбакка, чаҕылхай киирсиини уонна тактическай бэлэми көрдөрдүлэр.

Бу ситиһии бары кыттааччылар уонна кинилэр уһуйааччыларын дьулуурдаах үлэлэрин түмүгэ буолар диэн элбэхтэ бэлиэтэннэ. «Путь воина» күрэхтэһии улахан суолталааҕынан эрэ буолбакка, курсаннар үөрэх кэмигэр ылбыт билиилэрин практикаҕа туттууга суолталаах кэрчигинэн эмиэ буолар.
Күрэхтэһиилэр үөрүүлээх сабыллыыта дойдуларын көмүскүүргэ дьулуһар ыччат икки ардыгар сомоҕолоһуу уонна доҕордоһуу ураты бэлиэтинэн буолла. «Хотторбуттар суохтар — бары кыайыылаахтар!» — диэн Айсен Николаев түмүктээн эттэ. Күрэхтэһии кыттыылаахтарын икки ардыларыгар баар бырааттыы сыһыан уонна бэйэ-бэйэҕэ ытыктабыл суолтата үрдүгүн тоһоҕолоото.