Бүтүн Арассыыйатааҕы гиирэ успуордун турнирыгар Харатаала Арчылаан иккис миэстэҕэ тигистэ

Улан-Удэ куоракка ыытыллыбыт норуоттар икки ардыларынааҕы уонна Бүтүн Арассыыйатааҕы гиирэ успуордун турнирыгар  Нам улууһун «Олимпик» успуорт оскуолатын иитиллээччитэ  Харатаала Арчылаан иккис миэстэни ылары ситистэ, диэн Нам улууһун дьаһалтатын пресс-сулууспата иһитиннэрэр.

Ол курдук,  Арассыыйа маастара Иннокентий Окоемов иитиллээччитэ  Арчылаан (63 кг)  24 кг ыйааһыннаах гиирэни  201-дэ анньан,   32 очукуону аахсан,  үрүҥ көмүс мэтээл хаһаайынынан буолла. Ити Арчылаан тус бэйэтин рекорда буолар. 

Онон, норуоттар икки ардыларынааҕы таһымнаах  турнирга  Нам улууһун гиревиктэрэ Иннокентий Окоемов уонна кини иитиллээччитэ Арчылаан кыһыл көмүс уонна үрүҥ көмүс мэтээли ылан чаҕылхай көрдөрүүлэннилэр. 

Кэскиллээх эдэр күрэсчити Арчылааны  уонна кини Нам улууһун успуордун устуоруйатыгар гиирэ успуордугар үрдүк ситиһиилэринэн киирбит тириэньэрин  Иннокентий Окоемовы дьаһалта аатыттан эҕэрдэлээтилэр, өссө да саҥаттан саҥа ситиһиилэр кэлэн истиннэр диэн алгыс тылларын тиэрдэллэр.