Бүтүн Арассыыйатааҕы кэмпириэнсийэ саха литэрэтиирэтин чинчийээччилэрин түмтэ

Бүгүн, ахсынньы 2 күнүгэр, Дьокуускайга саха норуотун суругунан уус-уран айымньытын төрүттэрин уонна сайдыытын ырытарга анаммыт Бүтүн Арассыыйатааҕы кэмпириэнсийэ саха литэрэтиирэтин чинчийээччилэрин түмтэ.

РНА Сибиирдээҕи салаатын Гуманитарнай чинчийии уонна хотугу аҕыйах ахсааннаах норуоттар кыһалҕаларын үнүстүүтүн былаһааккатыгар исписэлиистэр суругунан литэрэтиирэ үөскээһинин туһунан матырыйаалларын билиһиннэрэллэр. Тэрээһин Алексей Кулаковскай бастакы айымньытын 125 сылыгар уонна саха тылынан бастакы суругунан тиэкис ааптара Афанасий Уваровскай төрөөбүтэ 225 сылыгар ананар.

«Бастакы суругунан пааматынньыктар уонна саха литэрэтиирэтэ үөскээһинин суоллара» диэн Бүтүн Арассыыйатааҕы научнай-практическай кэмпириэнсийэ Саха сириттэн уонна Арассыыйа араас эрэгийиэннэриттэн — Москваттан, Санкт-Петербуртан, Казаньтан, Уфаттан, Архангельскайтан, Новосибирскайтан, Горно-Алтайскайтан, Кызылтан, Улан-Удэттэн уо.д.а. куораттартан кыттааччылары түмтэ. Ону тэҥэ Монголияттан уонна Казахтантан исписэлиистэр кыттыыны ылаллар.

Тэрээһиҥҥэ барыта сүүсчэкэ кыттар. РНА СС Гуманитарнай чинчийии уонна хотугу аҕыйах ахсааннаах норуоттар кыһалҕаларын үнүстүүтүн дириэктэрэ Сардана Боякова кэмпириэнсийэ научнай көрүүлэри атастаһар уонна национальнай литэрэтиирэлэри үөрэтии боппуруостарын дьүүллэһэр былаһаакка буолбутун бэлиэтээтэ.

«Тэрээһиҥҥэ Арассыыйа бары эрэгийиэннэриттэн сүүстэн тахса киһи, ону сэргэ Монголияттан уонна Казахстантан чинчийээччилэр кытталлар. Бу үбүлүөйдээх эрэ буолан буолбакка, биһиги национальнай литэрэтиирэбит көхтөөхтүк сайда турарынан улахан суолталаах тэрээһин», — диэн Сардана Боякова кэпсээтэ. Ону таһынан, кэмпириэнсийэ чэрчитинэн Афанасий Уваровскай нэһилиэстибэтигэр уонна Эдьигээн улууһун култууратыгар анаммыт быыстапка аһылынна. Экспозицияҕа саха тылынан бастакы суругунан тиэкис ааптарын тыыннааҕар оҥоһуллубут бастакы мэтириэтэ, суруйааччы соҕотох баар бюһа, ону тэҥэ сэдэх эспэнээттэр туруорулуннулар.