Бүтүн Арассыыйатааҕы куонкурус 46 үлэтэ Саха сиригэр анаммыт

Москваҕа  «Дальний Восток — земля приключений» Бүтүн Арассыыйатааҕы куонкурус  иккис  сезонун кыайыылаахтарын наҕараадалаатылар. Быйыл  тэрийээччилэр кыттааччылартан 664 киинэни туттулар, бу — куонкурус бастакы сезонуттан үс төгүл элбэх.

Тоһоҕолоон эттэххэ, куонкурус 46 үлэтэ  Саха сиригэр, кини дьикти айылҕатыгар, култууратыгар уонна туристарга анаммыта болҕомтоҕо ылыллар.

Куонкурус сүрүн бирииһин 3 мөлүйүөн солкуобайы Москва олохтооҕо, М.В.Ломоносов аатынан СГУ геологияҕа факультетын ыстаарсай научнай үлэһитэ Илья Большаков  ылла. Кини киинэтэ Онекотан диэн Курил арыытыгар айаҥҥа анаммыт.

«Дальний Восток — земля приключений» Бүтүн Арассыыйатааҕы куонкурус  Юрий Трутнев көҕүлээһининэн,  Уһук Илиҥҥэ РФ бэрэсидьиэнин боломуочуйалаах бэрэстэбиитэлин аппараатын, Арассыыйа Илин дойдулары сайыннарыыга  министиэристибэтин,  “Уһук Илини уонна Арктиканы сайыннарыы корпорацията” АУо уонна “Социальнай көҕүлээһиннэр пуондалара” НКО өйөбүллэринэн ыытыллар.

Куонкуруһу  элбэх хонуктаах эспэдииссийэлэргэ сылдьар, өрүстэринэн устар уонна үөрэтиллибэтэх маршруттары чинчийэр айанньыттар кэрэхсииллэр.

2024 сылга Уһук Илиҥҥэ 6,5 мөлүйүөҥҥэ тиийэ турист сырытта, бу 2023 сыл көрдөрүүтүттэн 5 % элбэх. Эрэгийиэҥҥэ инвестиция бырайыактарын өйүүргэ экэниэмикэ ураты эрэһиимэ уонна судаарыстыба өйөбүлүн миэрэлэрэ бааллар.