Бүтүн Арассыыйатааҕы «Родители онлайн» пуорумҥа кыттыы — улахан чиэс… Өссө төрөппүт быһыытынан!
Оҕону — төрөппүт сиэркилэтэ дииллэр. Кырдьык да оннук, оҕобун араас түгэҥҥэ кэтээн көрүүбүнэн үүт-үкчү бэйэбин сүһэн ылан саҥардаҕына, аҕатын курдук тутуннаҕына, «буолар да эбит», — диэн үөрэбин. Икки тус-туспа дьон аналлаахтарын булсан, дьиэ кэргэн төрүттээн, оҕо төрөтөн орто дойдуга саҥа олоҕу бэлэхтииллэр… бу буоллаҕа олох дьоло…
Мин төрөппүт быһыытынан уһулуччу үчүгэйбин диир кыаҕым суох. Киһи сиэринэн… Ханнык эрэ түгэҥҥэ оҕом иитиитигэр көтүмэҕэйдик сыһыаннаспыт да түгэннэрим баара буолуо ээ… мөҕөрүм-этэрим хаһан эмит сыыһа буолуон эмиэ сөп. Мин курдук төрөппүттэр бу дойдуга элбэхпит буолуо. Ол эрээри, биһиги оҕобутугар күүстээх тапталбыт бу буоллаҕа кинилэргэ АЛГЫСПЫТ…
«Знание родители» уопсастыба, «Росдетцентр» үөрэх киинэ тэрийэр үс күннээх пуорумугар араас эрэгийиэннэртэн 550 киһи кытынна. Саха сириттэн 9 киһи кыттыбытыттан түөрдэ төрөппүт, түөрдэ сүбэһит уонна биир координатор. Чурапчыттан Евгения Горохова, Лидия Лукина, Парасковья Бандерова, Хаҥаластан Нюргуяна Петрова, Анастасия Баишева, Дьокуускайтан Марианна Бурцева, Динара Шарипова уонна Сунтаартан Кириэстээх сүбэһитэ Мария Михайлова уонна төрөппүт — мин. Пуорумҥа барар дьону сүүмэрдээһин Арассыыйа таһымыгар кытта тиийэ көрүллүбүт. Онно Сахабыт сирин «Тирэх киин» оҕо саас сирдьиттэрэ үлэлээбиттэр. Түгэнинэн туһанан улууспут Үөрэҕириитин сирдьитигэр, Маар Күөл оскуолатын үлэһитигэр Вера Саввиноваҕа уонна Сунтаар лиссиэйин сүбэһитигэр Саргылана Ивановаҕа барҕа махтал. Иккиэн видео оҥоруутугар, сайаапкаҕа, кэлэр-барар сырыыбытын кэпсэтиигэ улахан үлэни оҥордулар. Биир бэйэм бу пуорумҥа төрөппүт быһыытынан талыллан, олуһун дьоллоннум уонна саҥа, олус көхтөөх, көрдөөх ийэлэри кытта билсэн астынан аҕай кэллим. Тэрээһин ыҥырыылаахтарын айаннарын толору төлөөн, Измайлово түөлбэҕэ турар түөрт сулустаах «Альфа» гостиницаҕа пуорум ыытылынна. Босхо хонуктаах, аһылыктаах, олус тупсаҕай түһүлгэҕэ тэриллибитэ бэйэтэ туспа кэрэ түгэн.
Пуорум көмөтүнэн сөмөлүөтүнэн аан бастаан көппүт, Кыһыл Болуоссаты көрбүт Чурапчыттан төрөппүт кытта баара. Хата, кинини — Пашаны кытта олус чугастык билсэн, үс күн устата аҕас-балыстыы курдук сырыттыбыт. Тэрээһин кэмигэр тэрийээччилэр сүрүн дьоннорун кытта биллиилээх блогердар сүбэ-соргу биэрэр кэпсээннэрин истэн олуһун сайынныбыт. «Знание родители» уопсастыба үөрэх эйгэтин сайыннарыыга арааһы тобулар. Бу сырыыга төрөппүттэргэ, сүбэһиттэргэ улахан болҕомто уурбут. Тоҕо диэтэххэ төрөппүттэр ситими олохтооччулар, кинилэр үөрэҕириини кытта сиэттиһэ сылдьан үлэлээтэхтэринэ улахан ситиһии дииллэр.
Ийэ дьоло оҕону кытта кэпсэтии, дьиэ кэргэн — оскуола ситимэ бу пуорум сүрүн этиитэ. Пуорумҥа умнуллубат түгэн элбэҕэ, ону сылдьыбыт дьон үөрэ-көтө өр да кэмҥэ саныахпыт турдаҕа Паша, Маша, Лида, Женя, Марианна, Динара, Настя, Нюргуяна!
Тускулаана ГОРОХОВА-КОБЕЛЬЯНОВА
Хаартыскалар: Тускулаана Горохова-Кобельянова тиксэриилэрэ
Былыр аныгы курдук аптека да, балыыһа даҕаны диэн суох. Онон хас эмэ үйэ тухары көлүөнэттэн…
Байыаннай дьайыы кыттыылаахтарыгар уонна кинилэр дьиэ кэргэттэригэр психологтар көмөлөрө, өйөбүллэрэ салҕанар. Ааспыт нэдиэлэҕэ, ону сэргэ…
Сорохтор уонунан, сүүһүнэн миэтэрэ үөһэ ытталлар, атыттар саастыылаахтарын кырбыылларын видеоҕа усталлар. Бу барыта биир эрэ…
Ким этэҥҥэ сылдьыан, уһун үйэлэниэн баҕарбат буолуой? Бары да уһуннук, дьоллоохтук олорору сэргиир, сэҥээрэр буоллахпыт.…
Дьааҥы улууhугар Табалаахха оҕо уhуйааныгар "Аҕыйах ахсааннаах хотугу норуоттар үгэстэригэр уhуйуу - төрөөбүт дойдуга бэриниилээх…
Быйылгыттан Саха сиригэр Ил Дархан Айсен Николаев өйөбүлүнэн “Мин бастакы идэм” диэн үрдүкү кылаас үөрэнээччилэрин…