Бүтүн Арассыыйатааҕы туристическай пуорумҥа “Дальний Восток – Земля приключений” панельнай сиэссийэ буолла

“Открой Дальний Восток” III Бүтүн Арассыыйатааҕы туристическай пуорум чэрчитинэн «Дальний Восток — Земля приключений» куонкуруска аналлаах сиэссийэ буолла.

“РФ бырабыыталыстыбата Уһук Илиҥҥэ туризмы сайыннарыыга үлэлэһэр. Бу бөдөҥ эрэгийиэҥҥэ “Туризм уонна ыалдьытымсах буолуу индустрията” нацбырайыак курдук хас да судаарыстыбаннай бырагыраама үлэлиир. Судаарыстыба өйөбүлүнэн сүүһүнэн инвестиционнай бырайыактар олоххо киирэллэр, санаторийдар, гостиницалар, туристар сылдьар ыллыктара, пааркалар тутуллаллар. Саҥа авиационнай маршруттар киирэн иһэллэр. Бэрэсидьиэн сорудаҕынан маннык маршруттарынан дьону таһыахтаах“Байкал” сөмөлүөт тутуллар. Бу былааны олоххо киллэриигэ сүрүн оруолу дьоннор ылаллар – үлэһит, турбут-олорбут, биисинэһи сайыннарар, эрэгийиэннээҕи туристическай бреннэри хамсатар, дьону угуйар саҥа туочукалары киллэрэн иһэр. Бу эйгэҕэ дьоһун бырайыагынан «Дальний Восток — Земля приключений» куонкурус буолла. Куонкурус макроэрэгийиэн туһунан киинэлэри устар айанньыттары, блогердары түмтэ, кинилэр Уһук Илин кэрэ бэлиэ сирдэрин мөлүйүөнүнэн дьоҥҥо билиһиннэрдилэр”, — диэтэ РФ Бырабыыталыстыбатын Бэрэссэдээтэлэ – Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев.

Куонкурус дьүүллүүр сүбэтин бэрэссэдээтэлэ Николай Табашников иһитиннэрбитинэн, дьүүллүүр сүбэ сыанабылыгар хайыы үйэ 162 кылгас киинэ, ол иһигэр Саха сирин устун айан туһунан 5 киинэ киирбит.

Санатан эттэххэ, «Дальний Восток — Земля приключений» куонкуруска кыттыаххын баҕардаххына, 8 мүнүүтэҕэ диэри уһуннаах Уһук Илиҥҥэ айаныҥ туһунан кылгас киинэ устан, ахсынньы 30 күнүгэр диэри путешественникдв.рф саайтка ыытаҕын. Төрөппүт салалтатынан уон сааһын туолбут оҕо эмиэ кыттар.

Сүрүн бириис – 3 мөл. солк., анал аат кыайыылааҕынан буоллаххына 1 мөл. солк., 2 миэстэ иһин – 300 000-лыы солк; 3 миэстэҕэ – 100 000-лыы солк.  Маны таһынан Чукотка автономнай уокуругун губернатора Чукотка туһунан киинэ устубут дьоҥҥо туспа 1 мөл. солк. бириис олохтоото, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.