Бүтүн Арассыыйатааҕы үлэ дьаарбаҥкатын эрэгийиэннээҕи түһүмэҕэ буолла

Бүгүн, муус устар 18 күнүгэр, «Россия моя история»  түмэлгэ Бүтүн Арассыыйатааҕы «Работа в России. Время возможностей» диэн үлэ дьаарбаҥкатын эрэгийиэннээҕи түһүмэҕэ буолла.

Тэрээһиҥҥэ сүрүн спикерынан СӨ Нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ Светлана Горюшинская санаатын үллэһиннэ:

— Бүгүҥҥү күҥҥэ үлэ ырыынагар балаһыанньа куһаҕана суох. Сыл ахсын үлэтэ суох буолуу сыыппарата аччыыр. Биир кэлим үлэ миэстэтин көрдөрөр «Работа России» цифровой платформаҕа үлэ биэрээччилэр 9 тыһыынча үлэ миэстэтин таһаарбыттара. Отон нэһилиэнньэ дьарыктаах буолуутун сулууспатыгар уопсайа 2.8 тыһ. киһи үлэ көрдөнөр.

АЛРОСА хампаанньа каадыры кытта үлэлиир сүрүн исписэлиис Наталья Герасимова:

-Биһиги тэрилтэбит алмаас хостооһунан дьарыктанар улахан бырамыысыланнай тэрилтэ буолар. Сүрүннээн үлэһиттэр Мииринэй оройуонунун Айхал, Удачнай бөһүөлэктэригэр миэстэтигэр олорон үлэлииргэ А, В, С, Д категориялаах суоппардар наадалар.  Хандьыдааттар резюмеларын тутабыт, ханнык үлэ миэстэтэ баарынан ыларга кыһанабыт.