Бүтүн дойду ыччата снайпер идэтин баһылыыр

Бу сылтан «ВОИН» киин үөрэх бырагыраамаларыгар бэлэмнээһин саҥа хайысхатын – снайпины киллэрдэ. Арассыыйатааҕы бойобуой снайпиҥҥа федерациятын кытта тэҥҥэ оҥоһуллубут кууруһу бүтүн дойду ыччата «Эдэр дьоруойдар кэмнэрэ» диэн сайыҥҥы тус симиэнэлэргэ баһылыыр.

Кинилэри «ВОИН» киин уопуттаах инструктордара үөрэтэллэр, үгүстэрэ байыаннай дьайыыга кыттыбыт дьон. От ыйыгар кинилэр Тюменнааҕы филиал баазатыгар бэлэмнэнии бырагырааматын түмүктээбиттэрэ – ДНӨ-тэн, ЛНӨ-тэн, Саха сириттэн, Бурятияттан, Татарстантан, Чувашияттан, Чечняттан, Хабаровскай уонна Камчатка кыраайдарыттан, Белгородскай, Волгоградскай, Кемеровскай, Псковскай, Свердловскай, Тюменскай уобаластартан уонна ЯНАО-тан 27 уһуйааччы дойду бастыҥ исписэлиистэрин салайыытынан снайпинга үөрэтии уратыларын баһылаатылар уонна билиилэрин курсааннары кытта үллэстэ сылдьаллар.

«“ВОИН” киин бастакы байыаннай бэлэмнэниини систиэмэлээхтик сөргүтэр. Снайпинг кууруһа – бу көннөрү үөрэтии кууруһа буолбатах. Маннык бырагыраамалар Аҕа дойду көмүскээччилэрин саҥа көлүөнэтин патриотическай иитиигэ олоҕу уураллар.

Үөрэҕи дьиҥнээх бойобуой уопуттаах инструктордар, ол иһигэр байыаннай дьайыы кыттыылаахтара ыыталлара улахан суолталаах. Кинилэри бэлэмнээһиҥҥэ Чуумпу акыйаан флотун 155-с гвардейскай туспа байҕал пехотатын биригээдэтин  снайпердара кыттыбыттара. Кинилэр байыаннай дьайыы кэмигэр үрдүк көрдөрүүлэри ситиспиттэрэ», – диэн РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ, «ВОИН» киин Кэтээн көрөр сүбэтин бэрэссэдээтэлэ Юрий Трутнев эттэ.

Бастыҥ ытааччылар симиэнэ анал снайперскай этэрээтигэр киирэллэр. «Хас биирдии ытыыны бары күүһүнэн чопчу оҥорорго кыһаллабын. Снайперскай бэлэминэн дьарыктаныахпын олус баҕарар этим, биһиэхэ маннык кыах баарыттан үөрэбин. Снайпиҥҥа, мин санаабар, уоскулаҥ, тымныы өй-санаа уонна үчүгэй харах наада», – диэн курсаан Дмитрий Хабаров кэпсээтэ.