Быыбар чиэһинэйдик, дьэҥкэтик барарын Уопсастыбаннай сэбиэт хааччыйыа

Аны күһүн Саха сиригэр киэҥ хабааннаах быыбардар ааһаллара сабаҕаланар. Ил Дарханы, норуот дьокутааттарын, итини сэргэ Дьокуускай куорат Дууматын, 9 улуус баһылыгын итиэннэ 21 оройуон сэбиэтин дьокутааттарын талыахпыт, 23 сэлиэнньэ баһылыгын талыахпыт.

Хандьыдааттары туруоруу уонна регистрациялааһын түмүктэнэн эрэр.

Ил Дархан быыбарыгар 8 киһи бэлитиичэскэй баартыйалартан турда. Ил Түмэн дьокутааттарын быыбарыгар барыта 592 хандьыдаат турда, ол иһигэр 411 киһи бэлитиичэскэй баартыйалартан, 172 хандьыдаат 9 быыбардыыр холбоһуктан итиэннэ 9 биир мандааттаах быыбардыыр уокуруктартан бэйэлэрэ туруоруммут дьон.

Бүгүн, от ыйын 26 күнүгэр, СӨ Уопсастыбаннай балаатата быыбарга хандьыдааттары туруоруу уонна СӨ Киин быыбардыыр хамыыһыйатын бэрэстэбиитэллэрэ кыттыылаах уопсастыбаннай кэтээн көрөөччүлэр үлэлэрин тэрийии туһунан суруналыыстары кытары көрсөн кэпсээтилэр.

Көрсүһүүнү сүрүннээччи СӨ Уопсастыбаннай балаататын бэрэссэдээтэлин эппиэтинэһин толорооччу Станислав Иванов уопсастыбаннай кэтээн көрүү үлэтигэр бэлэмнэнии хаамыытын туһунан билиһиннэрдэ. Кини кэлэр быыбарга өрөспүүбүлүкэ Уопсастыбаннай балаатата быыбар дьэҥкэ буоларын туһугар, 1975 уопсастыбаннай кэтээн көрөөччүнү кытыннарар былааннаахтарын кэпсээтэ.

Хандьыдааттары туруоруу уонна регистарциялааһын туһунан СӨ Киин быыбардыыр хамыыһыйатын чилиэнэ Эльвира Мярикянова иһитиннэрдэ.

«Биһиги бары быыбар буоларыгар, чиэһинэйдик, дьэҥкэтик ааһарыгар сыал-сорук туруоран үлэлиибит. Бүгүҥҥү туругунан өрөспүүбүлүкэ быыбардааччытын ахсаана 641 592 киһи. Барыта 87 быыбардыыр хампаанньа барыа, ол иһигэр икки хампаанньа өрөспүүбүлүкэтээҕи таһымнаах – Ил Дархан быыбара уонна норуот дьокутааттарын талыы буолуо. Билиҥҥитэ Ил Дархан быыбарыгар 8 киһи туруоруммут буоллаҕына, регистрацияҕа докумуоннарын үс хандьыдаат эрэ туттарда, ол иһигэр биир хандьыдаат регистрацияламмыта. Бүгүн 18:00 ч. диэри эрэ регистрацияны барыахтаахтар. Оттон Ил Түмэн быыбарыгар 592 хандьыдаат туруорунна, ол иһигэр 411 хандьыдаат 6 баартыйа өрөспүүбүлүкэтээҕи быыбардыыр испииһэгинэн турда. Биир мандааттаах быыбардыыр уокуруктарга 377 хандьыдаат регистрацияланна», — диэтэ Эльвира Мярикянова.

Оттон уопсастыбаннай кэтээн көрөөччүлэри үөрэтии туһунан СӨ Уопсастыбаннай балаататын бэрэссэдээтэлин солбуйааччыта Лена Ефремова кэпсээтэ.

«Уопсастыбаннай балаата Саха сиригэр быыбар чиэһинэйдик уонна дьэҥкэтик барарын хааччыйыа. Ону 2000 кэриҥэ киһи кэтээн көрүө», — диэтэ Лена Ефремова.

Куоластааһын хаамыытын тутулуга суох уопсастыбаннай мониторинын туһунан тутулуга суох уопсастыбаннай мониторинг эспиэрэ Николай Барамыгин билиһиннэрдэ.

Уопсастыбаннай балаата чилиэнэ, Уопсастыбаннай кэтээн көрүү ыстаабын преподавателэ Надежда Зайкова быыбар дьэҥкэ буоларын, сыыһа-халты, өйдөммөт балаһыанньа тахсыбатын туһугар биһиги кэтээн көрөөччүлэрбит үлэлииллэр диэн бэлиэтээн эттэ.