Быыбар иккис күнэ саҕаланна

Бүгүн, кулун тутар 16 күнүгэр Арассыыйа бэрэсидьиэнин талар быыбар иккис күнэ саҕаланна. Лоп курдук сарсыарда 8 чаастан Саха сирин бары  быыбардыыр учаастактар үлэлэрин саҕалаатылар.

Саха сиринээҕи Киин быыбардыыр хамыыһыйа иһитиннэриитинэн, бастакы күн түмүгүнэн, бэҕэһээ Саха сирин олохтоохторун кыттыыта 41,12% тэҥнэспит.

Убаастанар төрүөтүнэн быыбардыыр учаастакка кыайан кэлбэт дьон дьиэлэриттэн куоластыахтарын сөп. Маныаха кулун тутар 17 күнүгэр күнүс 14:00 чааска диэри бэйэлэрин учаастактааҕы быыбардыыр хамыыһыйаларыгар сайабылыанньаларын ыытыахтарын сөп. Манна даҕатан эттэххэ, бэҕэһээ өрөспүүбүлүкэ хас даҕаны ытык кырдьаҕаһа ити курдук дьиэтигэр куоластаабытын туһунан сонунун киэҥник сырдатар сириэстибэлэр суруйан тураллар. Бүгүн субуота, онон дьон өссө көхтөөхтүк кытталлара эрэбил.