Быыбардааччылар Уус Ньара баһылыгынан Иван Максимовы таллылар

Болдьоҕун иннинэ ыытыллыбыт «Уус Ньара бөһүөлэгэ» МТ баһылыгын быыбара түмүктэннэ.

Быыбарга барыта 10 хандьыдаат кытынна. Онтон 7 киһи — бэйэ туруорунуута, 1 киһи — «Биир ньыгыл Арассыыйа» , 1 киһи — «Родина», 1 киһи — ЛДПР баартыйалартан.

Уус Ньара бөһүөлэгэр 8 быыбардыыр учаастак үлэлээтэ. 3566 быыбардааччы испииһэккэ киирбит. 48 кэтээн көрөөччү үлэлээтэ.

Өймөкөөн улууһун территориальнай быыбардыыр хамыыһыйа  2022 сыл сэтинньи 20 күнүнээҕи боротокуолугар олоҕуран, «Уус Ньара бөһүөлэгэ» МТ баһылыгын быыбарын түмүгэ маннык буолла:

— Иван Максимов — 283,

— Елена Сапегина — 219,

— Виктория Понамарчук — 188,

— Ирина Шишман — 76,

— Василий Ефимов — 58,

— Афанасий Егоров — 51,

— Вячеслав Федосеев — 43,

— Евгений Митрофанов — 38,

— Светлана Крыловецкая — 23,

— Георгий Паскал — 18 куолас.

Эрэллээх кыайыыны «Биир ньыгыл Арассыыйа» баартыйаттан турбут Иван Максимов ситистэ. Бу чааска Иван Егорович биир дойдулаахтарыттан — Өймөкөөн улууһун кииниттэн уонна нэһилиэктэриттэн эҕэрдэ бастыҥын тутар. Улуус киинин саҥа талыллыбыт  баһылыга бар дьонугар социальнай ситимнэринэн кинини өйөөбүт быыбардааччыларга махталын тиэртэ. «Улууспут киинин сайдыытын туһугар сомоҕолуулаахпытын көрдөрдүбүт. Эһиги өйөбүлгүт миэхэ улахан суолталаах уонна эппиэтинэстээх. Бөһүөлэкпит чэчирии сайдарын туһугар бииргэ үлэлээтэхпитинэ эрэ барыны бары кыайыахпыт»,-  диэн кини  бэлиэтээтэ.

Иван Максимов Сунтаар улууһун Бүлүүчээн нэһилиэгиттэн төрүттээх. Өймөкөөн улууһун Сордоҥноох нэһилиэгэр икки болдьох устата 10 сыл баһылыгынан үлэлээбитэ. Ол түмүгэр билигин бу нэһилиэк улууска эрэ буолбакка, өрөспүүбүлүкэҕэ бастыҥ нэһилиэктэр ахсааннарыгар холобурга сылдьар. Иван Егорович үлэлиир сылларыгар Сордоҥнооххо нэһилиэк киин түөлбэтигэр сайыҥҥы бассейн тутуллубута — кини сатабыллаах салайааччы буоларын туоһута. Онон кэлиҥҥи сылларга тас көстүүтүнэн, олоҕун-дьаһаҕын таһымынан мөлтүү быһыытыйбыт улуус киинин Уус Ньараны Иван Максимов эрэллээх илиитигэр ылан, сайдыы суолугар үктэннэриэ диэн эрэл улахан.

Хаартыскаҕа ааптар түһэриитэ.