Быыбардыыр хамыыһыйалар мунньахтара саҕаланна

Кулун тутар 15-17 күннэригэр Арассыыйа бэрэсидьиэнин талыы быыбара буолар. Бу дойдуга улахан суолталаах түгэҥҥэ бэлэмнэнэн, Саха сиринээҕи Киин быыбардыыр хамыыһыйа сэминээр-мунньаҕы тэрийэн ыытта. Манна 35 улуустан, куораттан территориальнай быыбардыыр хамыыһыйалар бэрэссэдээтэллэрэ кытыннылар, быыбары тэрийии үлэтин ымпыгын-чымпыгын быһаарыстылар.

— Бүгүҥҥү туругунан, бэрэсидьиэн быыбарыгар 4 хандьыдаат регистрацияланна. Сокуон ирдэбилинэн, олунньу 10 күнүн кэнниттэн быыбар бүлүтүөннэрин бэчээттээн барыахпыт. 790 бастайааннай учаастактааҕы хамыыһыйалар үлэлиэхтэрэ. Маны тэҥэ эбии 21 быыбардыыр учаастагы арыйдыбыт. Ыраах, суола-ииһэ суох сирдэргэ баар быыбардааччыларга усулуобуйа тэрийэргэ улахан үлэ барар. Быыбар буолуо 20 күн инниттэн балыксыттар, булчуттар, табаһыттар, метеорологтар, гидрологтар, уо.д.а. үлэһит дьон эрдэ куоластыыр бырааптаахтар. Сабаҕалааһын быһыытынан, маннык дьон ахсаана 8 тыһыынчаттан тахса киһи, — диэн Киин быыбардыыр хамыыһыйа бэрэссэдээтэлэ Евгений Федоров бэлиэтээтэ.

Кини этэринэн, быыбардыыр хамыыһыйалары улахан үлэ күүтэр. Иһитиннэрэр-сырдатар, тэрийэр үлэ номнуо саҕаланан, үгэннээн турар. Билиҥҥи уустук кэмҥэ быыбардыыр хамыыһыйаларга куттала суох буолууну хааччыйыы сүрүн миэстэҕэ турар. Быыбарга полиция, «Росгвардия» үлэһиттэрэ кыттыахтара. Маны тэҥэ, быыбар хаамыытын, этэргэ дылы, аан дойду барыта кэтээн көрүөҕэ.

Онон быыбардыыр хамыыһыйалар үлэһиттэригэр улахан эппиэтинэстээх үлэ саҕаланна. Сэминээр-мунньахха саҥаны киллэрии уонна сокуон уларыйыыларын көрүөхтэрэ.

Саха сиригэр барыта 790 быыбардыыр учаастак үлэлиэҕэ. Бары учаастактарга уопсастыбаннай кэтээн көрөөччүлэр үлэлиэхтэрэ, 295 учаастакка быһа эпиирдээх видео, атыттарга видеонан кэтээн көрүү олохтонуоҕа.

Тохсунньу 29 күнүттэн атын сиргэ баран куоластыыр буоллахха, эрдэттэн сайабылыанньаны биэрии саҕаламмыта. Сайабылыанньалары быыбардыыр хамыыһыйалар, Элбэх өҥөнү оҥорор киин, «Госуслуги» портал нөҥүө кулун тутар 11 күнүгэр диэри биэриэххэ сөп. Ону тэҥэ, олунньу 17 күнүттэн кулун тутар 7 күнүгэр диэри «ИнформУИК» бырайыак үлэтин саҕалыыр. Бу бырайыак чэрчитинэн, анал пуормалаах, дастабырыанньалаах үлэһиттэр дьиэлэринэн сылдьан, быыбар, хандьыдаттар тустарынан сиһилии кэпсиэхтэрэ, ыйытыыларга хоруйдуохтара.