Быыбарга хандьыдааттары регистрациялааһын түмүктэннэ

Балаҕан ыйын 14 күнүгэр анаммыт быыбар хандьыдааттарын регистрациялааһын түмүктэннэ диэн СӨ Киин быыбарын хамыыһыйата иһитиннэрэр.

Агитация кэмэ номнуо саҕаланна. Санатан суруйдахха, Саха сиригэр 4 муниципальнай оройуон баһылыгын, 30 улууска 100 нэһилиэк, бөһүөлэк уонна куорат баһылыгын, ону тэҥэ 23 улууска нэһилиэктэр, бөһүөлэктэр сэбиэтттэрин талыахтара. 9 улууска оройуон сэбиэтин, 8 улууска сорох нэһилиэк сэбиэтин дьокутааттарын самалык быыбара буолуо.

Бүгүҥҥү күҥҥэ уопсайа хандьыдааттартан 1823 киһи докумуона киирбит, онтон 1789-һа регистрацияны ааспыт. Түөрт улууска баһылыкка 20 киһи регистрарцияланна. Биллэрин курдук, саамай элбэх хандьыдааттаах Уус Алдан, Хаҥалас буолар. Онтон Өлөөҥҥө — 4 киһи, Сунтаарга — 3 киһи. Нэһилиэк баһылыктарыгар 259 киһи турбутуттан, 7 киһи ааспатах. Кинилэр сүрүннээн нэһилиэнньэттэн илии баттааһынын кыайан хомуйбатахтар, ким эрэ хойутаан докумуонун киллэрбит. Нэһилиэк дьокутааттарыгар 1000-н тахса киһиттэн аҕыс киһиэхэ аккаастаммыт.

Быйыл уопсайа 222 быыбар хампаанньата ыытыллыа. Регистрация кэннэ түөрт нэһилиэккэ

– Орто Халыма Сыбаатайыгар баһылыкка, Сунтаар Илимнииригэр, Орто Халыма Алыһыайыгар, Бүлүү Балаҕаччытыгар нэһилиэк сэбиэттэрин быыбарын хампаанньалара балаҕан ыйыгар буолбат буолла, болдьоҕо уһаан биэрдэ.
Ити курдук баартыйалар, дьоннорун быыбар бары таһымыгар туруордулар. «Биир ньыгыл Арассыыйа» баартыйа 940 киһи, «Сиэрдээх Арассыыйа-Арассыыйа патриоттара-Кырдьык туһугар» баартыйа – 78, «КПРФ» – 70, ЛДПР – 51, «Саҥа дьон» баартыйа – 41, «Арассыыйа хомуньуустара» — 2 уонна «Родина» – 1 киһи регистрацияны аастылар.