Быыһааччылар айаннаан иһэн сүппүт Кэбээйи ыалын буллулар

Бэҕэһээ, атырдьах ыйын 15 күнүгэр, 20.40 чааска Саха сирин быыһааччылара бөртөлүөтүнэн анаан көрдөөн, Кэбээйи улууһун Сэбээн Күөл нэһилиэгиттэн айаннаан иһэн сүппүт икки оҕолоох ыалы буллулар.

Бу туһунан быыһааччылар телеграм-ханаалларыгар видеоҕа устубуттарын сырдаттылар. 2012 уонна 2019 сыл төрөөбүт оҕолорун кытта кэргэнниилэр “Урал” массыынанан Сиэгэн Күөлгэ айаннаабыттар. Кинилэри Ньора өрүскэ билэр киһилэрэ көрсөр дуогабардаах эбиттэр. Атырдьах ыйын 12 күнүгэр ол киһи болдьоспут миэстэлэригэр тиийэн күүтэ сатаабыт да, дьоно биллибэтэхтэр. Саха сирин быыһааччылара бэҕэһээ 16 чааска Дьокуускайтан Сэбээн Күөлгэ тиийэн сүппүт дьон аймаҕын кытта кэпсэтэн баран,  салгыы көрдүү көппүттэр.

Сүппүт ыалы Сэрэгэ үрэх аттыттан булбуттар — бөртөлүөттэн массыынаны уонна балаакканы көрбүттэр. Көстүбүт дьону бөртөлүөтүнэн Дьокуускайга аҕалбыттар. Кинилэр туруктара, доруобуйалара этэҥҥэ.

Кэбээйи улууһугар  “Урал” массыынанан айаннаан иһэр ыал хайдах сүтэ сылдьыбытый?

Икки оҕолоох ыал сүрүн соруктара – оҕолорун эмтэтээри Дьокуускайга көтөөрү “Урал” массыынанан Сиэгэн Күөлгэ аттаммыттар. Айаҥҥа хоҥноллоругар күн-дьыл үчүгэй эбит. Айаннаан иһэн, былааннаммыттарын курдук, балааккаҕа хоммуттар. Сарсыныгар  күүстээх ардах түһэн, суоллара быһыллыбыт. Онон «Надежда» диэн быыһыыр пууҥҥа ардах тохтуурун кэтэһэн баран,салгыы айанныырга быһаарыммыттар. Онно биэс күн тохтоон кэтэһэргэ күһэллибиттэр. Уу таһыма түспүтүн көрөн, салгыы айанныырга санаммыттар. Пуунтан 12 чаас саҕана тахсыбыттар. Аара  бөртөлүөт тыаһын истибиттэр да, көтөр аал көтөн ааспытын эрэ көрөн хаалбыттар. Хайыахтарай, хоноору бэлэмнэнэн, балаакка туруора сырыттахтарына, бөртөлүөттэрэ төннөн кэлбит.  Ыал өссө да икки-үс күн айанныахтаах эбиттэр. Аны астара-үөллэрэ бүппүт. Бу  дьон аччыктаан хайдах буолуохтара биллибэт этэ. Онон быыһааччылар кэмигэр кэлэн, оҕолор төрөппүттэрин кытта этэҥҥэ быыһаннылар.

Ыраах уһук хотугу улуустар тулуурдаах дьоно — өрүү итинник мүччүргэннээх айаннаах дьон. Муома Чыыстайын табаһыттара эмиэ киин сиргэ кэлээри итинник аара балаакканан хоно-хоно айанныыллар. Онон Сэбээн Күөл олохтоохторо оҕолорун Дьокуускайга аҕалан көрдөрөөрү, кутталлаах балаһыанньаҕа киирэн ыллылар. Биллэн турар,  кинилэр бу бастакы айаннара буолбатаҕа чахчы. Уруккуттан айанныы, тыаҕа балаакканан хоно сылдьарга үөрүйэх дьон буоллаҕа. Ол эрээри быйыл олус ардахтаах уонна тымныы буолан, хоту улуустарга олус уустук сайын ааһан эрэр.

Саха сирин быыһааччылара кэлиҥҥи кэмҥэ сотору-сотору араас быһылааҥҥа түбэспит дьону быыһыыр аатыгар сылдьаллар. Хата, дьолго, бары түбэлтэлэр үтүө сонунунан түмүктэнэнэн, бука бары бииргэ үөрэбит, дууһалыын чэпчии түһэбит. Онон олус наадалаах уонна абыраллаах идэлээх дьоммутугар – Саха сирин быыһааччыларыгар барҕа махталбытын тиэрдэбит!