Быыһааччылар Алдаҥҥа муммут отонньуту буллулар

Быыһааччылар Алдан оройуонугар отоннуу сылдьан муммут эр киһини буллулар диэн СӨ Быыһыыр сулууспата иһитиннэрэр.

Эр киһи сүппүтүн туһунан иһитиннэрии балаҕан ыйын 13 күнүгэр киирбит. Ол сарсыарда отонньут «Амур» артыал диэки барбыт уонна мунан хаалбыт. Кинини өрүһүйэ Алдантан көрдүүр-быыһыыр этэрээт биэс исписэлииһэ туруммут.

Ойуур аттыттан кини массыынатын, оттон сотору соҕус буолан баран бэйэтин булбуттар. Көрдөөччүлэр пилота суох көтөр аппарааты туһаммыттар. Отонньуту Томмокко тиэрдэн биэрбиттэр.