Быыһааччылар Өймөкөөҥҥө быыһыыр үлэлэри саҕалаатылар

Атырдьах ыйын 20 күнүгэр СӨ Гражданскай оборонаҕа миниистирин  бастакы солбуйааччы Айаал Вензель салайааччылаах 10 быыһааччы Өймөкөөҥҥө кэллилэр.

Кэлээт да, көтөн кэлбит “Полярные авиалинии” бөртөлүөттэринэн  Орто Балаҕан сэлиэнньэттэн дьону көһөрдүлэр.  Кутталлаах сиртэн 13 киһини, ол иһигэр оҕо күүтэр дьахтары уонна оҕолору,  таһаардылар.

“Бэҕэһээ Өймөкөөҥҥө бэйэтигэр уонна Хара Тумулга иккилии быыһааччылаах үс пуоһу туруорбуппут. Кинилэр уу таһымын суукканы быһа кэтээн көрөллөр. Бүгүн Айаал Ануфриевиһы кытары чөлүгэр түһэрэр үлэлэри сыаналаары  дьиэлэри кэрийэн көрүөхпүт.

Ону таһынан миэбэли таһаарыы, дьиэлэри куурдуу, муосталары көтүрүү уо.д.а. үлэлэргэ көмөлөһөргө олохтоох нэһилиэнньэттэн сайаапкалар киирдилэр. Быыһааччылар билигин үлэҕэ барытыгар кытталлар. Сарсын Дьокуускайтан волонтердар кэлиэхтээхтэр. Онуоха  диэри биһиги туох ханнык үлэ ыытыллыахтааҕын  быһааран, соруктары тыырыахтаахпыт.

Билигин уу таһыма биир турукка турар, тиэргэннэр ууга бардылар,  дьиэлэргэ уу киирбэтэ”, — диэн бөлөх ыстаарсайа, СӨ Быыһыыр сулууспатын аэромобильнай көрдүүр-быыһыыр сулууспатын подразделениетын начаалынньыгын солбуйааччы Павел Алексеев иһитиннэрдэ.