Быыһааччылар икки булчуту эвакуациялаатылар

Дьокуускай таһыгар икки булчут уустук балаһыанньаҕа түбэһэн, СӨ Быыһыыр сулууспатыгар сибээскэ тахсыбыт. Булчуттар массыыналарын уматыга бүппүтүн ааһан, үс көлүөһэлэрин тыына тахсыбыт. Бу туһунан СӨ Быыһыыр сулууспатын пресс-сулууспата иһитиннэрэр.

Быһылаан ахсынньы 3 күнэ үүнэр түүнүгэр буолбут. Булчуттар 112 нүөмэргэ 02:05 чааска эрийэн, массыыналара алдьаммытын уонна ханна баалларын эппиттэр. Кинилэр Молотов силээнин диэки сылдьыбыттар.

Ыйыллыбыт сиргэ Тит Алексеев салайааччылаах биэс быыһааччы туруммут. Булчуттары этэҥҥэ эвакуациялаабыттар.

«Быыһаммыт дьон доруобуйалара этэҥҥэ, мэдиссиинэ көмөтүгэр наадыйбатылар», — диэн Быыһыыр сулууспа иһитиннэрэр.