Быыһааччылар Кириһиэнньэ сөтүөтүгэр куттал суох буолуутун хааччыйыахтара

Тохсунньу 17 күнүгэр Дьокуускайга Күөх хонууга Кириһиэнньэ сөтүөтүгэр анаан балааккалары туруоран саҕалыылларын туһунан Саха сирин Быыһыыр сулууспатын пресс-сулууспата иһитиннэрэр.

Түөрт балаакка туруоруллуоҕа: биирэ – сөтүөлүүргэ, иккитэ – таҥас уларыттарга, өссө биирэ – куукунаҕа анаан. Уот тардыллыаҕа уонна сырдатыы оҥоһуллуоҕа.

Сыл аайы Кириһиэнньэ сөтүөтүн кэмигэр өрөспүүбүлүкэҕэ Саха сирин Быыһыыр сулууспатын быыһааччылара уонна водолазтара сибэтиэй ууга сөтүөлүү кэлбит дьоҥҥо куттал суох буолуутун хааччыйаллар. Кинилэр сүрүн соруктара – араас быһылааннары сэрэтии уонна сөтүөлээччилэргэ куттал суох буоларын хааччыйыы.

Быыһааччылар Дьокуускай, Нерюнгри куораттарыгар, Томмот бөһүөлэгэр, Сунтаар сэлиэнньэтигэр, Баатаҕай бөһүөлэгэр Кириһиэнньэҕэ анаан тэриллибит чардааттар тастарыгар дьуһуурустубалыахтара уонна  куттал суох буолуутун быраабылаларын тутуһалларын көрүөхтэрэ-истиэхтэрэ, сэрэтиэхтэрэ. Быыһааччылар көмөҕө наадыйар дьоҥҥо суһал көмөнү оҥорорго бэлэмнэр.