Быыһааччылар парашюта суох ыстанарга эрчиллэллэр

Арассыыйа ыксаллаах быһыыга-майгыга министиэристибэтин быыһааччылара уонна авиатордара бөртөлүөттэн парашюта суох түһүү үөрүйэхтэригэр эрчиллэллэр. 

Үөрүйэхтэргэ эрчиллээри, Дьокуускайдааҕы көрдүүр-быыһыыр этэрээт исписэлиистэрин бөлөҕө Киллэм сэлиэнньэтигэр тиийдилэр диэн Арассыыйа ыксаллаах быһыыга-майгыга министиэристибэтин пресс-сулууспата иһитиннэрэр.

Эрчиллии саҕаланыан иннинэ быыһааччылар инструктаһы аастылар, ыстанарга туттуллар тэриллэрин бэлэмнээтилэр уонна эрэллээх буолуутун бэрэбиэркэлээтилэр.

«Маннык эрчиллиилэр биһигини бөртөлүөт түһэр кыаҕа суох уустук сирдэригэр, эмсэҕэлээбиттэри быыһыыр үлэлэргэ бэлэмнииллэр. Бу эрчиллии кэмигэр хас биирдии быыһааччы уопсайа аҕыс төгүл бөртөлүөттэн түстэ,» — диэн Арассыыйа ЫБММ Дьокуускайдааҕы көрдүүр-быыһыыр этэрээтин начаалынньыгын солбуйааччы Евгений Золкин кэпсээтэ.