Быыһааччылар суолга муммут дьону быыһаатылар

Бэҕэһээ киэһэ Саха сирин Быыһыыр сулууспатын Түбэтээҕи  быыһыыр-хонтуруоллуур пуунун быыһааччылара Нам уонна Кэбээйи улуустарын кыраныыссаларыгар икки киһини эвакуациялаатылар. Бу туһунан СӨ Быыһыыр сулууспата иһитиннэрэр.

Ахсынньы 2 күнүгэр киэһэ 17 чаас 44 мүнүүтэҕэ суолларын сүтэрэн хаарга хаайтаран хаалбыт дьон туһунан иһитиннэрии киирбит. Эр киһи уонна дьахтар, дьиэ кэргэн Дьокуускай куораттан Кэбээйи улууһун Сииттэтигэр айаннаан испиттэр.  Кинилэр суолларын сүтэрбиттэр, массыыналара хаарга буксуйан хаалбыт.

Быыһааччылар (ыстаарсай быыһааччы Аркадий Федоров) тиийэн, массыынаны хаартан таһаарбыттар, эмсэҕэлээбиттэри Нам улууһун Булуус сэлиэнньэтигэр илдьибиттэр. Суолга хаайтарбыт дьон туруктара үчүгэй, мэдиссиинэ көмөтүгэр наадыйбатахтар.