Быыһааччылар түүн ойуурга муммут дьону буллулар

Ахсынньы 8 күнэ үүнэр түүнүгэр быыһааччылар Дьокуускай аттыгар ойуурга муммут дьону буллулар. Бу туһунан Быыһыыр сулууспа иһитиннэрэр. 

Бэҕэһээ киэһэ 10 чаас саҕана Бүлүүлүүр аартык 37-с килэмиэтиригэр сатыы хаамалларын сөбүлүүр дьахтар уонна эр киһи түүн ойуурга күүлэйдиэхтэрин баҕаран, массыынанан бырахтарбыттар. Массыыналара куоракка төннүбүт.

Өр-өтөр буолан баран, бу дьон муммуттарын билбиттэр. Хата, суотабай төлөпүөн сибээһэ хабар буолан, түүн 3 чаас саҕана Быыһыыр сулууспаҕа эрийбиттэр.

Таһырдьа 30 кыраадыс тымныы этэ. Быыһааччылар муммут дьон координаттарын ыыттарбыттар уонна тута айаннаан, биир чаас иһинэн, 3 чаас 48 мүнүүтэҕэ булбуттар.

Муммут дьон ыбылы тоҥмут, үлүйбүт көрүҥнээхтэр эбит. Буолумуна, түүн ойуурга хонор курдук халыҥ таҥастаах буолбатах буоллахтара. Онон куоракка аҕалаат, тута «суһал көмөнү» ыҥыран, быраастарга туттарбыттар. Хата, сибээс баар буолан, этэҥҥэ түмүктэммит.