Быыһааччылар Уус Маайаҕа ууга түспүт дьахтары көрдүү көттүлэр

От ыйын 13 күнүгэр 08:39 ч. Уус Маайатааҕы ЕДДС-ка Эдьээн сэлиэнньэтиттэн 15-20 км сиргэ Алдан өрүскэ «Крым» мотуордаах оҥочо түҥнэстибитин туһунан иһитиннэрии киирбит. Оҥочонон икки дьахтар айаннаан испит диэн СӨ Быыһыыр сулууспата иһитиннэрэр.

Быыһыыр сэлиэччиги кэтэ сылдьыбыт, 1990 с.т. дьахтары тыыннааҕын булбуттар. Оттон 1962 с.т. дьахтар быыһыыр сэлиэччигэ суох айаннаабыт буолан, булуллубатах.

От ыйын 13 күнүгэр 10 олохтоох киһи биэс оҥочонон көрдөөбүттэр даҕаны, булбатахтар.

Бүгүн, от ыйын 14 күнүгэр, киирбит сайаапканан, Саха сирин Быыһыыр сулууспатын Станислав Соломахин салайааччылаах түөрт водолаз ууга сүппүт дьахтары көрдүү көттүлэр.